१० असार, काठमाडौं । संयुक्त राष्ट्रसंघको मानवअधिकार नियोगले यस वर्ष म्यानमारमा अनुमानित २ लाख ३० हजार मानिस विस्थापित भएको बताएको छ । म्यानमारमा सैनिक कू पछि बढेको हिंसाका कारण ठूलो संख्यामा मानिसहरु विस्थापित भएको नियोगको भनाइ छ । उनीहरुलाई तत्काल सहयोगको आवश्यकता रहेको पनि नियोगले बताएको छ ।
राष्ट्रसंघको अफिस फर द कोर्डिनेसन ह्युमानिटेरियन अफ्यर्स (ओसीएचए)ले म्यानमारको पछिल्लो अवस्थाबारे जानकारी दिंदै म्यानमारमा हिंसा जारी रहेको र विस्थापित भएका मानिसहरु समस्यामा पर्न थालेको बताएको हो ।
म्यानमारमा गत फेब्रुअरीमा सेनाले प्रजातन्त्रवादी नेताहरुलाई हिरासतमा लिंदै कू गरेको थियो । त्यसयता म्यानमारमा निरन्तर सेनाविरुद्ध प्रदर्शन हुँदै आएको छ भने सेनाले उक्त आन्दोलनलाई व्यापक दमन गर्दै आएको छ । यो क्रममा अहिलेसम्म ८७० जनाको मृत्यु भइसकेको एसिस्टेन्स एसोसिएसन फर पोलिटिकल प्रिजनर्स (एएपीपी)ले बताएको छ ।
एजेन्सीहरुको सहयोगमा
