६ साउन, काठमाडौं । कोरोना महामारी रोकथामका लागि अष्ट्रेलियाको तीन शहरका एक करोड ३० लाख मानिस प्रभावित छन् । न्यू साउथ वेल्समा एक महिनादेखि, भिक्टोरियामा एक सातादेखि र साउथ अष्ट्रेलिया राज्यमा मंगलबारदेखि लकडाउन छ ।
लामो समय घरभित्रै थुनिनुपरेकामा मानिसहरुले भने लकडाउनप्रति असन्तुष्टि जनाउन थालेका छन् । अष्ट्रेलियाका दुई ठूला सहर न्यू साउथ वेल्सको राजधानी सिड्नी र भिक्टोरियाको राजधानी मेलवर्नमा लकडाउन कहिले हट्छ भन्ने निश्चित छैन । बेलायत र अमेरिकामा पछिल्लो समय लकडाउन हटाइएकाले अष्ट्रेलियाको संघीय सरकारमाथि पनि दबाब छ ।
अहिलेसम्म अष्ट्रेलियामा १४ प्रशितभन्दा कम मानिसले मात्र कोरोना खोप लगाएका छन् । यो दर विश्वका शक्तिशाली विभिन्न ३८ मुलुकको संगठन ओईसीडीमा आवद्ध देशबीच तुलना गर्दा सबैभन्दा कम हो ।
मुलुकमा कोरोना खोप लगाउने गति निकै सुस्त भएको भन्दै अष्ट्रेलियाका प्रधानमन्त्री स्कट मोरिसनको आलोचना भइरहेको छ । विपक्षी लेबर पार्टीका जिम काल्मर्स भन्छन्, ‘यी प्रधानमन्त्री जनता कष्टमा परिरहेको बेला हराउँछन् ।’
यद्यपि मोरिसनले भने यस विषयलाई सामान्य रुपमा लिएका छन् । ‘कुनै पनि मुलुकले महामारी नियन्त्रणको लागि शतप्रतिशत काम गर्न सकेका छैनन् । मलाई अष्ट्रेलियाका नागरिकले यो कुरा बुझ्नेछन्’, बुधबार स्थानीय सञ्चारमाध्यममा उनले भनेका छन् ।
मोरिसनले अष्टेलियाले कोरोना भाइरसको संक्रमण निकै कममा राख्न सफल भएको दावी गरेका छन् । अहिलेसम्म अष्ट्रेलियामा कोरोना संक्रमणको कारण ९१५ जनाको मृत्यु भएको छ । जबकी बेलायतमा मंगलबार एकैदिन ९० जनाको मृत्यु भएको थियो ।
कोरोना महामारी नियन्त्रणका लागि सीमा नाका बन्द गर्ने, क्वारेन्टिनको नियम ल्याउने र लकडाउन गर्नेजस्ता उपाय अपनाएको भन्दै प्रधानमन्त्री मोरिसनको प्रशंसा हुँदै आएको थियो । तर पछिल्लो महिनामा देखिएको कोरोनाको डेल्टा भेरियन्टले भने अष्ट्रेलियाले अपनाएको रोकथाका उपायलाई चुनौती दिएको छ ।
डेल्टा भेरियन्टको संक्रमण फेला परेपछि अष्ट्रेलियाको ठूलो सहर सिड्नीमा मात्रै १५ सयभन्दा धेरै मानिस संक्रमित भइसकेका छन् । बुधबारमात्र ११० नयाँ संक्रमित थपिएका छन् । जबकी सिड्नीमा अहिले चौथो साताको लकडाउन चलिरहेको छ ।
अहिले मानिसहरुलाई खाद्य सामग्री किन्न र अन्य अत्यावश्यक कामबाहेक घरबाहिर जाने अनुमति छैन । संक्रमण बढिरहेकाले आगामी सेप्टेम्बरसम्म पनि यो लकडाउन लम्बिनसक्ने आशंका छ ।
साउथ अष्ट्रेलिया राज्यमा पनि मंगलबारदेखि एक साताको लागि लकडाउन गरिएको छ । भिक्टोरियामा पनि कम्तीमा आगामी मंगलबारसम्म लकडाउन जारी रहनेछ ।
गत महिना अष्ट्रेलियाका सात सहरमा लकडाउन गरिएको थियो । अष्ट्रेलियाका अधिकारीहरुले अधिकांश मानिसले कोरोना खोप नपाउँदासम्म स्थानीय संक्रमण नियन्त्रणको कामलाई निरन्तरता दिने बताएका छन् ।
अष्ट्रेलियामा अक्सफोर्ड–एस्ट्राजेनेकाको खोप पर्याप्त छ । तर यो खोप लगाउँदा रगत जम्ने समस्याको जोखिम बढी हुने भन्ने हल्लाका कारण मानिसहरु डराइरहेका छन् । अष्ट्रेलियामा अनुमति पाएको फाइजरको खोप भने उसले सीमित मात्रामा पाइरहेको छ ।
बीबीसीबाट
