२४ साउन, सप्तरी । प्रदेश २ का प्रमुख राजेश झा ‘अहिराज’ ले गलत प्रक्रियाबाट नेपाली नागरिकता लिनेलाई मात्र नभई दिने कर्मचारीलाई पनि कारबाही गर्नुपर्ने बताएका छन् । किर्ते गरी नागरिकता लिने र दिने दुवै दोषी भएको उनले बताए ।
जिल्ला प्रशासन कार्यालय सप्तरीमा आइतबार सुरक्षा निकायका अधिकारी र सञ्चारकर्मीसँगको अन्तरक्रियामा प्रदेश प्रमुख झाले गलत प्रक्रियाबाट नागरिकता लिनेलाई मात्रै कारबाही हुने गरेको भन्दै दिने कर्मचारीलाई पनि कारबाही हुनुपर्ने बताए । ‘लिनेलाई कारबाही हुने अनि दिने व्यक्ति पेन्सन खाएर बस्नु ठीक होइन’ उनले भने, ‘दुवैलाई कारबाहीको दायरामा ल्याउनु जरुरी छ ।’
झाले राजनीति र अपराधलाई छुट्याउनुपर्ने पनि बताए । राजनीति र अपराध छुट्टाछुट्टै विषय भएको भन्दै उनले यो दुवैलाई चिनेर अगाडि बढे मात्र समाज पनि मजबुत बन्ने बताए । प्रदेश २ अपराध र अतिवादको चपेटामा रहेकाले यसतर्फ सबैले ध्यान दिनुपर्ने पनि प्रदेश प्रमुख झाले बताए ।
उनले सीमा सुरक्षा, नागरिकता, भ्रष्टाचार र राष्ट्रिय एकतामा कुनै किसिमको सम्झौता गर्न नसकिने बताए ।
