२४ भदौ, काठमाडौं । काठमाडौंको क्षेत्रपाटीमा रहेको छत्रपाटी निःशुल्क चिकित्सालयले अत्याधुनिक भवन बनाउने भएको छ । हाल सञ्चालनमा रहेको अस्पतालसँगैको जग्गामा ३५ करोड रुपैयाँको लागतमा आठतल्ले अत्याधुनिक भवन बन्ने भएको हो ।
बिहीबार काठमाडौं महानगरपालिकाका प्रमुख विद्यासुन्दर शाक्य र उपप्रमुख हरिप्रभा खड्गीले संयुक्त रुपमा भवनको शिलान्यास गरेका छन् ।
शिलान्यास कार्यक्रमलाई सम्बोधन गर्दै मेयर शाक्यले छत्रपाटी निःशुल्क चिकित्सालय नयाँ युगमा प्रवेश गरेको बताउँदै रकम अभावका कारण भवन निर्माण सम्बन्धी कार्य नरोकिने प्रतिबद्धता व्यक्त गरे । उनले जनताको सेवामा समर्पित र राम्रो काम हुने ठाउँमा रकम अभाव हुन नदिने बताए ।
उपमेयर खड्गीले छत्रपाटी निःशुल्क चिकित्सालयले काठमाडौंभित्रका ‘कोर सिटी’का जनताको सेवामा कुनै कसर बाँकी नराखेको बताइन् ।
काठमाडौं महानगरपालिकाले उपलब्ध गराएको पाँच करोड तथा अन्य दाताहरुले उपलब्ध गराएको थप डेड करोड रुपैयाँसहित निर्माण शुरु गरिएको अस्पताल व्यवस्थापन समितिका अध्यक्ष डा. मनोजमान श्रेष्ठले जानकारी दिए । दाताहरुबाट संकलित सहयोग रकमबाट अस्पताल भवन निर्माण सम्पन्न गर्ने लक्ष्य राखिएको उनले बताए ।
छत्रपाटी निःशुल्क चिकित्सालय २०१३ साल माघ २३ गते १० रुपैयाँको पूँजीबाट शुरु भएको नेपालको पुरानो सामुदायिक स्वास्थ्य संस्था हो ।
प्रतिक्रिया 4