गोरखाका ४ प्रदेश सभा क्षेत्रमा कांग्रेसको नेतृत्व चयन

१४ असोज, गोरखा । नेपाली कांग्रेसको १४औँ महाधिवेशन अन्तरगत जिल्लाको प्रदेश सभा निर्वाचन क्षेत्रको अधिवेशन सम्पन्न भएको छ । दुई संघीय निर्वाचन क्षेत्रका चार प्रदेश सभा क्षेत्रको अधिवेशन मंगलबार राति सककिएको हो ।

निर्वाचन क्षेत्र नम्वर १ ‘क’ प्रदेशको सभापतिमा खुन प्रसाद रेग्मी विजयी भएका छन् । रेग्मीले २०५ मत प्राप्त गरेका छन् भने उनका प्रत्यासी उत्तम अधिकारीले १८९ मत ल्याएका छन् । सभापतिका अर्का उमेदवार काजिराम अधिकारीले २५ मत प्राप्त गरेका थिए ।

उपसभापतिमा अर्जुन भट्टराई र कृष्णप्रसाद रेग्मी निर्विरोध चयन भएका छन् । सचिवमा कृष्ण पन्त र भरतप्रसाद रेग्मी र सहसचिवमा गोविन्द बास्कोटा र सुवास थापा चयन भएको निर्वाचन समितिले जनाएको छ ।

निर्वाचन क्षेत्र नम्बर १ ‘ख’ प्रदेश सभापतिमा ठाकुर भट्टसहित पदाधिकारी र सदस्य सर्वसम्मत चयन भएका छन् । उपसभापतिमा बलराम ढकाल र मणिलाल गुरुङ, सचिवमा यमलाल लामिछाने र ऋषिराम लामिछाने, सहसचिवमा विश्वनाथ अधिकारी र समिर ढकाल चयन भएको निर्वाचन समितिले जनाएको छ ।

निर्वाचन क्षेत्र नम्बर २ ‘क’ प्रदेश सभापतिमा दिर्घमान गुरुङ (नारायण) विजयी भएका छन् । गुरुङले १७९ मत ल्याएका छन् भने उनका प्रत्यासी भानुभक्त थापाले १०४ मत ल्याएका हुन् ।

उपसभापतिमा कमलादेवी देवकोटा र केदारनाथ देवकोटा बिजयी भएका छन् । त्यस्तै सचिवमा सुरज श्रेष्ठ र प्रसान्त देवकोटा बिजयी भएका छन् । सहसचिवमा सुजना श्रेष्ठ पन्त र किरण आले विजयी भएको निर्वाचन समितिले जनाएको छ ।

निर्वाचन क्षेत्र नम्वर २ ‘ख’ प्रदेश सभापतिमा दिनेश खनखवास विजयी भएका छन् । २०५ मत ल्याएर उनी विजयी भएका हुन् । उनका प्रत्यासी उमेदवार सिजन भट्टराईले १४३ मत ल्याएका छन् ।

उपसभापतिमा कृष्ण कुमार श्रेष्ठ र बल बहादुर धिताल निर्वाचित भएका छन् । सचिवमा सन्तोष दवाडी र कृष्ण बहादुर कुवँर र सहसचिवमा मनिता गुरुङ र बिराज भट्ट निर्वाचित भएको निर्वाचन समितिले जनाएको छ ।

१४औं महाधिवेशन अन्तरगत प्रतिनिधि सभा क्षेत्रको अधिवेशन भने यही असोज १५ गते हुदैछ । १५ गते निर्वाचन हुने भनिए पनि समय तालिकामा केही हेरफेर गरिएको जिल्ला निर्वाचन अधिकृत देव महतले बताए । ‘१५ गते साँझसम्म मनोनयन दर्ता, दाबी विरोध, अन्तिम नामावली प्रकाशन लगायतका काम सक्छौ,’ उनले भने, ‘१६ गते बिहान ८ बजेबाट मतदान शुरु हुन्छ ।’

उक्त अधिवेशनले प्रतिनिधि सभा निर्वाचन क्षेत्रमा सभापति सहितको कार्यसमिति र केन्द्रीय महाधिवेशन प्रतिनिधि चयन गर्ने छ । हालसम्म प्रतिनिधि सभा निर्वाचन क्षेत्र १ को सभापतिमा नारायण लामिछानेको मात्र आकांक्षी देखिएका छन् ।

निर्वाचन क्षेत्र नम्वर २ मा गोविन्द गुरुङ, जिवन वानिया र मान प्रसाद धितालको नाम चर्चामा रहेको पार्टी स्रोतले जनाएको छ ।

उक्त अधिवेशनले एक निर्वाचन क्षेत्रबाट कम्तिमा २५ जना महाधिवेशन प्रतिनिधि पनि चयन गर्नेछ । खुल्लातर्फ १४ जना र समानुपातिकतर्फ दश जना प्रतिनिधि चयन हुनेछन् । गोरखामा दुई प्रतिनिधि सभा निर्वाचन क्षेत्र छन् । प्रत्येक क्षेत्रबाट खुल्ला तर्फ करिब २० जनाले आकांक्षा देखाएका छन् ।

जिल्लाको अधिवेशन भने यही असोज १८ गते हुँदैछ । १८ गते मनोनयन लगायतका अन्य काम सकेपनि १९ गते बिहानबाट मतदान शुरु गरिने जिल्ला निर्वाचन अधिकृत महतले जानकारी दिए ।

जिल्ला सभापति पदका लागि हालसम्म नन्दु न्यौपानेले आकांक्षा देखाएका छन् । उनी अहिले पार्टी जिल्ला सचिव पनि हुन् । अरु भने अहिले मौन छन् ।