बाढीपीडितका लागि अजिरकोटले २७ लाख ६६ हजार रुपैयाँ सहयोग गर्ने 

१८ भदौ, काठमाडौं । भदौ १० गते रसुवाको भोटेकोशी हुँदै त्रिशूली नदीमा आएको विनाशकारी बाढी प्रभावितलाई गोरखाको अजिरकोट गाउँपालिकाले राहत तथा उद्धारका लागि सहयोग संकलन सुरु गरेको छ।

बाढीबाट प्रभावित नागरिकको उद्धार तथा राहतका लागि अजिरकोट गाउँपालिकाले २७ लाख ६६ हजार ४ सय ७४ रुपैयाँ ६७ पैसा जुटाउने निर्णय गरेको गाउँपालिकाका अध्यक्ष दीपक देवकोटाले जानकारी दिए। उक्त रकम गाउँपालिकाको विपद् व्यवस्थापन कोष तथा जनप्रतिनिधि, कर्मचारी र विद्यालयमा कार्यरत शिक्षक तथा कर्मचारीको पारिश्रमिक योगदानबाट संकलन गरिने उनको भनाइ छ।

गाउँपालिकाले बाढीबाट घाइते भएकाहरूको शीघ्र स्वास्थ्यलाभको कामना गर्दै सम्पर्कविहीन तथा हराइरहेका नागरिकको खोज तथा उद्धारमा जुट्न सम्बन्धित सबै पक्षलाई आग्रह गरेको छ। राहतका लागि गाउँपालिकाको विपद् व्यवस्थापन कोषबाट ५ लाख रुपैयाँ उपलब्ध गराउने निर्णय भएको अध्यक्ष देवकोटाको भनाइ छ।

बाँकी रकम भने गाउँपालिकाका जनप्रतिनिधि तथा कर्मचारीको पारिश्रमिक योगदानबाट संकलन गरिँदैछ।

निर्णयअनुसार गाउँपालिकाका जनप्रतिनिधिले १० दिन बराबरको पारिश्रमिक योगदान गर्नेछन्। अधिकृतस्तरका कर्मचारी तथा स्वास्थ्यकर्मीले ७ दिन, सहायकस्तरका कर्मचारीले ५ दिन र श्रेणीविहीन कर्मचारीले २ दिन बराबरको पारिश्रमिक योगदान गर्नेछन्।

त्यसैगरी, सामुदायिक विद्यालयका शिक्षक तथा कर्मचारी, बालविकास सहजकर्ता, सामुदायिक सिकाइ केन्द्रका सहजकर्ता र विद्यालय सहयोगीबाट समेत निश्चित अवधिको पारिश्रमिक योगदान संकलन गरिने गाउँपालिकाले जनाएको छ। यसरी संकलन हुने रकम बाढी प्रभावित नागरिकको उद्धार तथा राहतमा खर्च गर्ने निर्णय भएको छ। गाउँपालिकाले संकलित रकम प्रधानमन्त्री विपद् व्यवस्थापन कोषमा यथाशीघ्र जम्मा गर्ने जनाएको छ।

अध्यक्ष देवकोटाले बाढीबाट प्रभावित परिवारसँग गाउँपालिका साथै रहेको पनि बताएका छन्।