+
+

आफ्नो भूमिमा अमेरिकी सेना रहेको ताइवानी राष्ट्रपतिद्वारा पुष्टि

अनलाइनखबर अनलाइनखबर
२०७८ कात्तिक ११ गते ११:१८

११ कात्तिक, काठमाडौं । ताइवानी राष्ट्रपति साइ यिङ यिङ वेनले चिनियाँ खतरा दिनदिनै बढिरहेको बताएकी छन् ।

मंगलबार सीएनएनसँगको विशेष अन्तर्वार्तामा बोल्दै वेनले बेइजिङबाट हरेक दिन खतरा बढिरहेको बताएकी छन् । अमेरिका र चीनबीच तनाव चर्किरहेका बेला वेनले उक्त अभिव्यक्ति दिएकी हुन्।

अन्तर्वार्ताका क्रममा वेनले ताइवान लोकतन्त्रको स्तम्भ भएको समेत बताएकी छन् । चीनले ताइवानलाई कब्जा गरे लोकतन्त्र हार्ने र विश्वभर लोकतान्त्रिक मूल्य-मान्यताप्रतिको विश्वास जगाइराख्न ताइवानको रक्षा आवश्यक भएको उनको भनाइ थियो ।

ताइवानको सुरक्षा र लोकतन्त्रका लागि आफूहरूले निकै प्रयास गरिरहेको पनि वेनले बताइन् । ‘ताइवानका दुई करोड ३० लाख मानिसले आफ्नो र लोकतन्त्रको रक्षाका लागि हरेक निकै प्रयास गरिरहेका छन्’, उनले भनिन् ।

त्यस्तै राष्ट्रपति वेनले पहिलो पटक ताइवानी भूमिमा अमेरिकी सेनाको उपस्थिति रहेको पुष्टिसमेत गरेकी छन् । तर आफ्नो भूमिमा के-कति अमेरिकी सेना रहेको भनेर प्रस्ट पारिनन् ।

पछिल्लो समय चीन र ताइवानबीचको तनाव उत्कर्षमा पुगेको छ । यसै महिनाको सुरुमा चीनले ताइवानी आकाशमा हालसम्मकै धेरै लडाकु विमान उडाएको थियो ।

चीनसँग जारी तनावबीच संयुक्त राष्ट्रसंघमा अर्थपूर्ण भूमिकाका लागि ताइवानले लबिङ गरिरहेको छ । अमेरिकाले समेत राष्ट्रसंघमा ताइवानको ‘अर्थपूर्ण सहभागिता’प्रति आफ्‍नो समर्थन हुने जनाएको छ ।

तर चीनले भने ताइवानसँग राष्ट्रसंघमा आबद्ध हुने कुनै अधिकार नरहेको बताएको छ ।

सन् १९७१ अक्टोबर २५ सम्म ताइवान भिटोसहित राष्ट्रसंघको सदस्य थियो । त्यसपछि भने उक्त सिट चीनलाई प्रदान गरियो । त्यसयता ताइवानले राष्ट्रसंघ र यसअन्तर्गतका संगठनमा थप सहभागिता जनाउने प्रयास गरिरहेको छ ।

यो खबर पढेर तपाईलाई कस्तो महसुस भयो ?

Khusi
                                chhu

खुसी

Dukhi
                                chhu

दुःखी

Achammit chhu

अचम्मित

Utsahit Chhu

उत्साहित

Akroshit Chhu

आक्रोशित

प्रतिक्रिया

भर्खरै पुराना लोकप्रिय
Advertisment