भरतपुर सबस्टेसनको मर्मत सक्न कम्तिमा आठ घण्टा लाग्ने

१७ कात्तिक, चितवन । चितवनको भरतपुर सबस्टेसनमा रहेका पावर ट्रान्सर्फमरको मर्मत सक्न अझै कम्तिमा आठ घण्टा लाग्ने भएको छ । सबस्टेसनमा रहेका दुई ट्रान्सर्फमरमा समस्या आएपछि भरतपुर महानगरपालिका १ देखि १३ तथा २९ र तनहुँको देवघाट क्षेत्रमा मंगलबार दिउसोदेखि विद्युत आपूर्ति बन्द छ ।

बिग्रिएको ट्रान्सर्फमरलाई हटाएर २२.५ एमभीएको अर्को पावर ट्रान्सर्फमर जडानको कार्य भइरहेको छ । यो काम सक्न कम्तिमा पनि आठ घण्टा लाग्ने अनुमान गरिएको छ ।

अर्को ट्रान्सर्फमर पोखराबाट ल्याउने काम भइरहेको प्राधिकरणले जनाएको छ । अहिले जडान भइरहेको ट्रान्सर्फमरको काम सकिएपछि सर्बसाधारणलाई बत्ती आपूर्ति गरिने छ ।

तिहारको समयमै भरतपुर क्षेत्रमा विद्युत आपूर्ति बन्द भएपछि नेपाल विद्युत प्राधिकरणका कार्यकारी निर्देशक कुलमान घिसिङ, प्रसारण निर्देशनालयका उपकार्यकारी निर्देशक दीर्घायूकुमार श्रेष्ठसहितको टोलीले मर्मत कार्यको स्थलगत निरीक्षण गरी काम छिटो सक्न निर्देशन दिएको छ ।

कार्यकारी निर्देशक घिसिङले मर्मत कार्यको अनुमगन गरी जनशक्ति थपेर जतिसक्दो छिट्टो विद्युत आपूर्तिको व्यवस्था गर्न निर्देशन दिए ।

‘तिहारको बेला उपभोक्तालाई अँध्यारोमा राख्न हुँदैन, मर्मतका लागि श्रमिकहरु थपेर भए पनि तत्काल काम सक्नु पर्छ, तत्कालका लागि उद्योगहरुलाई दिइएको आपूर्ति कटौती गरी ग्राहस्र्थवगलाई तिहारमा बत्ती बाल्न पाउने व्यवस्था मिलाउनु पर्छ,’ उनले भनेका छन् ।

सबस्टेसनमा रहेका दुई वटा ट्रान्सर्फमरमध्ये एउटामा शनिबार विहानबाट समस्या देखिएको थियो । सबस्टेसनमा रहेको अर्कोमा मंगलबार दिउँसोबाट समस्या देखिएपछि भरतपुर क्षेत्रमा विद्युत आपूर्ति बन्द भएको थियो ।

अहिले वैकिल्पक व्यवस्था गरी हस्पिटलहरु, खानेपानी, जिल्ला प्रशासन  तथा प्रहरी, विमानस्थललगायतका क्षेत्रमा विद्युत आपूर्ति सुचारु गरिएको छ । सबस्टेसनबाट विद्युत आपूर्ति गर्ने १० वटा फिडरहरुमध्ये एउटा मात्र सञ्चालनमा ल्याउन सकिएको छ ।

अहिले सबस्टेसनमा समस्या आउँदा यस क्षेत्रका करिब ५५ हजार ग्राहक विद्युत सेवाबाट वञ्चित भएको प्राधिकरण भरतपुर वितरण तथा ग्राहक सेवा केन्द्रका प्रमुख राजीवकुमार सिंहले बताए ।