यी हुन् अस्वाभाविक मात्रामा चाँदी आयात गर्ने कम्पनी

३० कात्तिक, काठमाडौं । सरकारले थालेको छानबिनमा केही कम्पनी तथा फर्महरुले नेपालमा अस्वाभाविक रुपमा चाँदीको आयात गरेको भेटिएको छ ।

कतिपय कम्पनीले तीन महिनामा १० हजार किलोग्राम भन्दा धेरै चाँदी नेपाल भित्र्याएको अनुसन्धानमा संलग्न अधिकारीहरुले जनाएका छन् । सरकारको प्रारम्भिक अनुसन्धानमा यस्ता ६ वटा कम्पनी र फर्म फेला परेका छन् ।

दुबई र हङकङबाट खरिद गरिएको उक्त चाँदी त्रिभुवन अन्तर्राष्ट्रिय विमानस्थल हुँदै नेपाल ल्याइएको थियो । चाँदीको उक्त कारोबारको वैधताबारे सरकारले छानबिन गरिरहेको छ ।

चालु आर्थिक वर्ष ०७८/०७९ को तीन महिना र गत आर्थिक वर्ष ०७७/०७८ मा यी कम्पनीको चाँदी आयात अस्वाभाविक देखिएको छानविनमा संलग्न एक अधिकारीले बताए ।

‘चाँदीको शंकास्पद कारोबारमा परेका धेरै फर्म र कम्पनीबारे छानबिन भइरहेको छ, हामी अस्वाभाविक कारोबार गहिराइमा पुगेर हेर्दै छौं,’ स्रोतले अनलाइनखबरसंग भन्यो । चाँदी आयात गर्न पाइन्छ तर यसलाई नेपालमा वैध रुपमा बिक्री गरियो कि गरिएन भनेर अहिले आफुहरुले छानबिन गरिरहेको ती सरकारी अधिकारीले बताए ।

यो पनि पढ्नुहोस

चाँदी तस्करीको ‘ट्रान्जिट’ बन्दै देश

को हुन् आयातकर्ता ?

अनलाइनखबरलाई प्राप्त विवरण अनुसार प्रारम्भिक चरणमा ६ वटा फर्मको चाँदी आयात शंकाको घेरामा परेको छ । सुन चाँदीको गहना तथा सजावटका वस्तु बिक्री तथा निर्यात गर्ने उद्देश्य बोकेकादेखि घरजग्गा र धागो कारोबारमा संलग्न व्यक्तिहरुसम्म पनि चाँदी आयातमा जोडिएका छन् ।

काठमाडौंको नक्सालमा रहेको नोभा सिल्भर यस्तो छानबिनको घेरामा छ । यो फर्म सलिम अन्सारी नामक व्यक्तिको नाममा रहेको पाइएको छ ।

बालुवाटारमा रहेको स्वीस सिल्भर प्रालि पनि चाँदी आयातमा ठूलो कारोबारी रहेको अनुसन्धानमा देखिएको छ । यो कम्पनीले छोटो अवधिमा १० पटक भन्दा बढी हजारौं किलो चाँदी आयात गरेको पाइएको छ । सुन चाँदीको कारोबार गर्ने उद्देश्यले स्थापित यो फर्म सुरेन्द्र कलवारको नाममा छ ।

काठमाडौं थापाथलीमा रहेको नवदुर्गा टे«ेडिङ पनि चाँदी आयातको काममा ठूलो हिस्सेदार देखिएको छ । ज्योति कुमारी सरावगी यो फर्मको सञ्चालकको रुपमा छिन् । यो फर्मले धागोको कारोबार पनि गर्छ । यसको कारोबार पनि नेपालमा औसत चाँदी आयातमा संलग्नहरु भन्दा कयौं गुणा धेरै रहेको पाइएको अनुसन्धानमा संलग्न अधिकारीहरुले बताएका छन् ।

यस्तै, ललितपुरको बालकुमारीमा रहेको शास्ता ट्रेडिङ प्रालि चाँदी आयातमा संलग्न अर्को प्रमुख कम्पनी हो । महेन्द्र गोयलको यो फर्मको चाँदी आयात छोटो समयमै हजारौं किलोमा छ ।

काठमाडौं ज्ञानेश्वरमा रहेको युरिका इन्भेष्टमेन्ट कम्पनीले पनि चाँदीको कारोबार गर्ने गरेको पाइएको अधिकारीहरुले बताएका छन् । वित्त क्षेत्रमा पनि लगानी गर्ने यो कम्पनीले पनि छोट्टो समयमा धेरै परिमाणको चाँदी आयात गरेको छ । फर्म राजेन्द्र न्यौपानेको नाममा छ ।

उता विराटनगरको टेक्नोजय ज्वेलरी प्रालि पनि ठूलो मात्रामा चाँदीको कारोबारमा संलग्न रहेको पाइएको छ । चाँदीको आयातमा संलग्न यो फर्म विजय राठीको नाममा छ ।

तीन महिना अस्वाभाविक आयात

चालु आर्थिक वर्षको तीन महिनामा १० करोड ७९ लाख १० हजार १६२ ग्राम अर्थात १ लाख ७ हजार ९१० किलो चाँदी नेपाल भित्रिएको छ । सो चाँदी आयात गर्न १० अर्ब १७ करोड १४ लाख ३८ हजार रुपैयाँ मुलुकबाट बाहिरिएको छ । यो उच्च आयातमा माथि उल्लेखित ६ कम्पनीसहितका अन्य फर्महरु प्रमुख रुपमा सामेल देखिएको अनुसन्धान अधिकारीहरुले बताएका छन् ।

एक कम्पनी वा फर्मको आयात परिणाम हजार भन्दा बढी किलोमा रहेको पाइएको छ ।

‘चालु आवको तीन महिनाको चाँदीको आयात गत आर्थिक वर्षको पुरै आयात भन्दा झण्डै ३६ हजार किलो धेरै देखिन्छ । गत वर्ष ७१ हजार ७४६ किलो चाँदी नेपाल भित्रिएको अनुसन्धानमा देखिएको छ’ एक अनुसन्धान अधिकृत थप्छन्, ‘अनुसन्धान जारी नै रहेकाले थप रहस्य खुल्दै जानेछ ।’