कमजोर भिजिबिलिटीका कारण खोप बोकेको चिनियाँ विमान अवतरण नगरी फर्कियो

५ पुस, काठमाडौं । चीनबाट कोभिड-१९ विरुद्धको खोप लिएर आएको विमान अवतरण नै नगरी चीन फर्किएको छ । बिहान ८ बजेर ३५ मिनेटमा त्रिभुवन विमानस्थलमा अवतरण गर्नुपर्ने विमान कमजोर भिजिबिलिटीका कारण चेङ्दु फर्किएको त्रिभुवन विमानस्थलको कार्यालयले जनाएको छ।

स्वास्थ्य सेवा विभागको खोप आपूर्ति शाखाका फार्मेसी अफिसर बडेबाबु थापाका अनुसार उक्त विमानमा १२ लाख १६ हजार डोज भेरोसेल खोप आउँदै थियो ।

‘भिजिबिलिटीका कारण प्राविधिक रुपमा विमान अवतरण गर्नु जोखिमयुक्त हुने देखिएपछि विमान चेङ्दु फर्किएको हो,’ विमानस्थलका प्रवक्ता प्रेमनाथ ठाकुरले भने, ‘फेरि विमान चेङ्दुबाट नेपाल आउने तयारीमा छ ।’

उनकाअनुसार बिहान त्रिभुवन विमानस्थलमा बाक्लो हुस्सुका कारण भिजिबिलिटी निकै कमजेर थियो । अहिले भने सबै खालका उडान अवतरण नियमित रुपमा चलिरहेको छ ।