सभापतिले शक्तिका रुपमा स्वीकार नगरेको शेखर समूहको निष्कर्ष

२० पुस, काठमाडौं । नेपाली कांग्रेसको डा. शेखर कोइराला समूहले सभापति शेरबहादुर देउवाले आफूहरुलाई शक्तिका रुपमा स्वीकार नगरेको निष्कर्ष निकालेको छ ।

कोइराला समूहका नेताहरुको मंगलबार बसेको बैठकमा केन्द्रीय सदस्यहरुको मनोनयन र राष्ट्रियसभाका उम्मेदवारहरु चयनबारे छलफल भएको थियो । सभापति देउवाले दुई पटक गरेको मनोनयनमा रामचन्द्र पौडेलबाहेक उनलाई मत दिनेहरु मात्र परेका छन् ।

राष्ट्रियसभा सदस्यको उम्मेदवार चयनका क्रममा पनि सभापति देउवाले डा. शेखरको साटो रामचन्द्र पौडेलसँग परामर्श गरेका थिए । ‘व्यक्तिको सन्दर्भमा हामीले प्रश्न गरेका होइनौं, तर जुन प्रक्रिया अपनाइयो, त्यसमा म सन्तुष्ट छैन,’ शेखर समूहमा रहेका केन्द्रीय सदस्य अर्जुनरसिंह केसीले भने, ‘हामीले भागवण्डा होइन, साझेदारी खोजेका हौं ।’

तर सभापति देउवा एक्लै जान खोजेकाले शुभ संकेत नदेखिएको नेता केसीले बताए । उनले अघि भने, ‘अहिले पनि हामी सभापतिलाई सहयोग गर्न चाहन्छौं, तर नेतृत्वले सहयोग लिन जान्नुपर्छ ।’ उनका अनुसार १४ औं महाधिवेशनमा डा. शेखरको समूहबाट उम्मेदवार भएकाहरुको बैठक बुधबार दिउँसो २ बजे बोलाइएको छ ।