यो हो संसारको ठूलो परिवार, २ करोड ७० लाख सदस्य

एउटा परिवारमा अधिकतम कति सदस्य होलान् ? वैज्ञानिकहरूले एउटा यस्तो परिवार पत्ता लगाएका छन् जहाँ सय, हजार होइन पूरै २ करोड ७० लाख जना सदस्य छन् । यो परिवार विश्वमा अहिलेसम्म फेला परेको सबैभन्दा ठूलो पारिवारिक वंश रहेको वैज्ञानिकहरूको भनाइ छ ।

यी सबै मानिसहरू एक अर्कामा टाढाटाढाका भए पनि नातेदार हुन् । यो पारिवारिक वंश १० हजार वर्ष पूरानो भएको बताइएको छ ।

यो पारिवारिक वृक्षले मानिसको उत्पत्तिका विषयमा बुझ्नका लागि सहयोग गर्ने वैज्ञानिकहरूको अपेक्षा छ । साथै यो जम्बो पारिवारिक वृक्षले विभिन्न खाले चिकित्साजन्य रहस्यहरू सुल्झाउन पनि सहयोग गर्नेछ ।

शोधकर्ता टोलीका प्रमुख डाक्टर यान वोंगका अनुसार यो विशाल फेमिली ट्री ले जेनेटिक विविधतालाई बुझ्नका लागि पनि सहयोग गर्नेछ ।

साइन्स जर्नलमा छापिएको उक्त शोध अनुसार वैज्ञानिकहरूले विभिन्न ८ वटा डाटाबेसमा रहेका तीन हजार ६०९ जना मानिसको जिनको अध्ययन गरेका थिए । त्यसपछि कम्प्युटर एल्गोरिदमका माध्यमबाट उनीहरूका पूर्वजहरू संसारमा कहाँ कहाँ बस्दथे भन्ने खोजी गरे । त्यसबाट वैज्ञानिकहरूले उक्त वंशमा २ करोड ७० लाख मानिस रहेको पत्ता लगाए ।

अक्सफोर्ड विश्वविद्यालयसँगको सहकार्यमा डाक्टर यानको टोलीले यो शोध गरेको थियो । शोधकर्ताहरूले सो पारिवारिक वृक्ष अर्थात् फेमिली ट्री मा एक पछि अर्को गर्दै तानेदारलाई जोडे । ती मानिसहरू कुनै न कुनै रुपमा एक अर्कासँग रगतको नातामा जोडिएका थिए । ती मानिसहरूको डिएनए केही सय वर्षदेखि नै जम्मा गरिएको थियो र करोडौं मानिसहरूको नमूना जाँच गरी वैज्ञानिकहरूको टिमले संसारको सबैभन्दा ठूलो पारिवारिक वृक्ष बनाएका थिए ।

एजेन्सी