+
+

गाउँपालिका अध्यक्षको दौडमा ७६ वर्षीय ‘खरायो बा’

हरि अधिकारी हरि अधिकारी
२०७९ वैशाख २५ गते १९:१८

२५ वैशाख, विराटनगर । मोरङको कानेपोखरी गाउँपालिका अध्यक्षमा ७६ वर्षीय वृद्ध सूर्यबहादुर धिमाल उम्मेदवार बनेका छन् ।

माओवादी केन्द्रबाट अध्यक्षको उम्मेदवार बनेका धिमाल पूर्व फुटबल खेलाडी हुन् । उनलाई स्थानीयले ‘खरायो बाबै’ भनेर सम्बोधन गर्छन् । पाँच वर्षयता वृद्धभत्ता पाइरहेका उनी आफूलाई खरायो बाबै भन्न रुचाउँछन् ।

जनप्रतिनिधिमा ह्याट्रिक गर्ने दाउमा रहेका उनी पालिका चलाउने भिजन भएकाले उम्मेदवार बनेको दाबी गर्छन् । ‘त्यहाँ (पालिकामा) फुटबल खेल्न जाने होइन, ज्ञान र योजना लिएर जाने हो,’उनी भन्छन्, ‘सक्रियताको हिसाबले म एभरग्रिन हो ।’

२०७४ सालको स्थानीय तह निर्वाचनमा उनी माओवादी केन्द्रबाट कानेपोखरी गाउँपालिका अध्यक्षको उम्मेदवार बनेका थिए । एमाले उम्मेदवार ताराबहादुर काफ्ले निर्वाचित हुँदा उनी दोस्रो बनेका थिए ।

वैशाख ३० गते हुने निर्वाचनका लागि उनी घरदैलोमा छन् । उनीसँगै नेकपा एमालेबाट राजमती इङ्नाम र नेपाली काङ्ग्रेसबाट सञ्जय भट्टराई उम्मेदवार छन् ।

एमाले उम्मेदवार इङ्नाम निवर्तमान कानेपोखरी गाउँपालिका उपाध्यक्ष हुन् । विराटनगर स्थायी बसोबास भएका भट्टराई कानेपोखरीका लागि नयाँ उम्मेदवार हुन् । एमालेले उपाध्यक्षमा भोला अधिकारी, नेपाली कांग्रेसले मनु गुरुङ र माओवादी केन्द्रले तारा ओझालाई उम्मेदवार बनाएको छ ।

पेसाले अमिन धिमाल २०३८ सालमा तत्कालिन मोरङको बयरवन गाबिस- ७ को निर्वाचित वडाध्यक्ष हुन् । त्यसपछि उनी तत्कालिन बयरवन गाउँ पञ्चायतको उपप्रधानपञ्च निर्वाचित भए ।

२०४३ सालमा उपप्रधानपञ्च उठ्दा उनले खरायो चुनाव चिह्न पाएका थिए । खरायो चुनाव चिह्न लिएर निर्वाचित भएका कारण उनलाई स्थानीयले ‘खरायो बाबै’ भन्छन् ।

२०४३ सालको चुनावमा सोमनाथ बाँस्तोलालगायत ४ जना प्रतिस्पर्धीको मत जोड्दा पनि नपुग्ने गरी मत ल्याएको उनी दाबी गर्छन् । ‘त्यसबेला ३ हजार ७ सय हाराहारी मत ल्याएको थिएँ,’उनी भन्छन्,‘ खरायो चुनाव चिह्न लिएर जितेका कारण अहिले पनि खरायो बाबैं भन्छन् ।’

उनी चुनाव जिते भ्रष्ट्राचार नगर्ने र अध्यक्षले प्रयोग गर्ने गाडीलाई एम्बुलेन्स बनाउने बताउँछन् ।

लेखकको बारेमा
हरि अधिकारी

अधिकारी अनलाइनखबरका विराटनगरस्थित संवाददाता हुन् ।

यो खबर पढेर तपाईलाई कस्तो महसुस भयो ?
Khusi chhu

खुसी

Dukhi chhu

दुःखी

Achammit chhu

अचम्मित

Utsahit Chhu

उत्साहित

Akroshit Chhu

आक्रोशित

प्रतिक्रिया

भर्खरै पुराना लोकप्रिय
Advertisment

छुटाउनुभयो कि ?