+
+

प्रदेश सरकार हेरफेर नगर्ने पक्षमा कांग्रेस

लिलु डुम्रे लिलु डुम्रे
२०७९ जेठ २० गते १९:०३

२० जेठ, काठमाडौं । सत्ता घटकको प्रमुख दल नेपाली कांग्रेस प्रदेश सरकारको नेतृत्व हेरफेरमा नलाग्ने भएको छ ।

वर्तमान सरकार बनिसकेपछि मधेस र सुदूरपश्चिमबाहेक सबै प्रदेशमा सरकारको नेतृत्व गर्ने दल परिवर्तन भएका थिए । हाल सत्तारुढ गठबन्धनमा रहेका दलहरुबीच कांग्रेस, माओवादी केन्द्र र एकीकृत समाजवादीबाट २/२ प्रदेशको मुख्यमन्त्री बन्ने र जनता समाजवादीले मधेस प्रदेशको सरकार बनाउने सहमति बनेको थियो ।

त्यसअनुसार गण्डकी र कर्णाली प्रदेशमा कांग्रेसका नेता मुख्यमन्त्री छन् । माओवादी केन्द्रले लुम्बिनी र सुदूरपश्चिम सरकारको नेतृत्व गरेको छ । एकीकृत समाजवादीले प्रदेश १ र बागमतीमा सरकार चलाएको छ । मधेश प्रदेशमा जनता समाजवादी पार्टीका नेता मुख्यमन्त्री छन् ।

यसअघि नेकपा एमालेको प्रदेश सरकार हटाई हालको सत्तारुढ गठबन्धनको सरकार निर्माणका बेला कतिपय प्रदेशमा दलहरुबीच आलोपालो मुख्यमन्त्री हुने सहमति पनि बनेको थियो । तर, केन्द्रस्तरमा कांग्रेस, माओवादी केन्द्र र एकीकृत समाजवादीले २/२ र जसपाले एक प्रदेशको नेतृत्व लिने तय भइसकेकाले अब प्रदेशस्तरमा भएको आलोपालो सम्बन्धी सहमति कार्यान्वयन नहुने भएको छ ।

एउटा प्रदेशमा सरकारको नेतृत्व परिवर्तन गर्दा अन्य प्रदेशमा समेत असर गर्ने भएकाले यो विषय नउठाउने निश्कर्षमा पुगेको कांग्रेस नेताहरु बताउँछन् । यो विषय उठाउँदा गठबन्धनमा समेत किचलो उत्पन्न हुनसक्ने कांग्रेसको आशंका छ ।

गत साउन अन्तिम साता कांग्रेस र माओवादी केन्द्रले लुम्बिनीमा आधा/आधा कार्यकाल नेतृत्व गर्ने सहमति गरे र सो अनुसार पहिलो कार्यकाल माओवादी केन्द्रका कुलप्रसाद केसी मुख्यमन्त्री बनेका थिए ।

दुई दलबीच भएको सहमति कार्यान्वयन भएको भए केसीको कार्यकाल चैत २७ मा सकिनुपर्ने थियो । माओवादीले लुम्बिनीको नेतृत्व छाडे अर्को प्रदेशमा कांग्रेसले छाड्नुपर्ने भएकाले विगतमा प्रदेशस्तरमा भएका सहमतिलाई कांग्रेसले बिर्सने भएको छ ।

‘लुम्बिनीमा भएको सहमतिअनुसार आधा कार्यकाल कांग्रेस र आधा माओवादीले नेतृत्व गर्ने सहमति बनेकै हो । माओवादीलाई अहिले लुम्बिनी प्रदेशको मुख्यमन्त्री छोड भन्दा अर्को कुन ठाउँमा दिने त ?’ शीर्ष तहका एक कांग्रेस नेताले भने, ‘माओवादीलाई लुम्बिनी प्रदेशको मुख्यमन्त्री छोड भन्न तिर हामी लाग्दैनौं । किनकी, त्यहाँ माओवादीले छोड्नेवित्तिकै अर्को स्थानमा हामीले उसलाई छोडिदिनुपर्छ । माओवादीलाई २ प्रदेशको मुख्यमन्त्रीबाट एउटामा झार्ने अनि कांग्रेस २ बाट ३ प्रदेशको मुख्यमन्त्री बन्ने कुरा हुँदैन ।’

माओवादी संसदीय दलका नेता कुलप्रसाद केसी मुख्यमन्त्री बनेर उनको कार्यकाल सकिएपछि कांग्रेसका संसदीय दलका नेता वीरेन्द्र कनोडिया मुख्यमन्त्री हुने सहमति बनेको थियो । कांग्रेसबाट लुम्बिनी प्रदेशसभा सदस्य रहेका फखरुद्धिन खान पुरानो सहमति कार्यान्वयन नहुने बताउँछन् ।

‘लुम्बिनीको समझदारी पछि केन्द्रमा अर्को सहमति भयो । बागमती र प्रदेश १ को सरकार बनेको बेला शीर्ष तहमा छुट्टै समझदारी बन्योे । तीन दलले २/२ प्रदेशको सरकारको नेतृत्व गर्ने समझदारी भएको थियो’ खानले भने, ‘लुम्बिनीमा नेतृत्व परिवर्तनको सम्भावना कम हुँदै गएको छ । माथिबाट ठोस निर्णय नभइकन प्रदेश स्तरबाट पहिलेको सहमति लागु हुने अवस्था देखिँदैन ।’

केन्द्रमा भएको सहमति अनुसार लुम्बिनीमा सरकारको दाबी नगर्न कांग्रेसले तल्लो तहलाई निर्देशन समेत दिएको छ । कांग्रेसका प्रदेश तहका नेताले चासो राख्दा केन्द्रीय नेताहरुले सरकार परिवर्तनको विषयलाई प्राथमिकता नदिन निर्देशन दिएका छन् ।

‘प्रधानमन्त्री र गृहमन्त्रीसँग परामर्श छलफल भएको छ । माओवादीका अध्यक्ष प्रचण्डसंग पनि छलफल भएको हो’, कांग्रेस प्रदेश सांसद खानले भने, ‘एउटा प्रदेशमा छोड्ने र अर्को प्रदेशको नेतृत्व लिँदा नागरिकमा पनि गलत सन्देश जाने भएकाले परिवर्तन हुने सम्भावना अहिले देखिदैन ।’

गठबन्धनलाई संघ र प्रदेशको निर्वाचनमा थप बलियो बनाउने ध्येयले कांग्रेसले पूर्व सहमतिलाई बाहिर ल्याएर सरकार परिवर्तनको नीति नलिने भएको छ ।

आलोपालो गर्ने सहमति अनुसार कांग्रेसको नेतृत्वमा लुम्बिनीमा सरकार बन्नुपर्ने भएपनि आफ्नो दल त्यस दिशामा नलाग्ने लुम्बिनी प्रदेशका सभापति अमरसिंह पुनले बताए ।

‘स्थानीय तहको चुनावपछिको परिस्थिति फरक ढंगले अघि बढेको छ’ पुनले अनलाइनखबरसँग भने, ‘यहाँ (लुम्बिनीमा) माओवादीले छोड्यो भने उसलाई अर्को ठाउँ कहाँ दिने त? अर्को समस्या आउँछ ।’

लेखकको बारेमा
लिलु डुम्रे

लिलु डुम्रे अनलाइनखबरको राजनीतिक व्यूरोमा कार्यरत छन् ।

यो खबर पढेर तपाईलाई कस्तो महसुस भयो ?

Khusi
                                chhu

खुसी

Dukhi
                                chhu

दुःखी

Achammit chhu

अचम्मित

Utsahit Chhu

उत्साहित

Akroshit Chhu

आक्रोशित

प्रतिक्रिया

भर्खरै पुराना लोकप्रिय
Advertisment

धेरै कमेन्ट गरिएका

छुटाउनुभयो कि ?