+
+

अग्रिम बुकिङ ‘ट्रेन्ड’ले पर्यटक बढ्ने संकेत, होटल व्यवसायी उत्साहित

कोरोना भाइरस (कोभिड–१९) महामारीपछि नराम्रोसँग प्रभावित बनेको पर्यटन क्षेत्रमा क्रमशः सुधार हुँदै जाँदा आगामी पर्यटकीय सिजनमा पर्यटक बढ्ने अपेक्षा व्यवसायीले गरेका छन् । अग्रिम बुकिङको ट्रेन्डले यस्तै संकेत गर्ने व्यवसायीहरुको भनाइ छ ।

अच्युत पुरी अच्युत पुरी
२०७९ भदौ ३ गते १६:५५
फाइल तस्वीर

३ भदौ, काठमाडौं । कोरोना भाइरस (कोभिड–१९) महामारीपछि नराम्रोसँग प्रभावित बनेको पर्यटन क्षेत्रमा क्रमशः सुधार हुँदै जाँदा आगामी पर्यटकीय सिजनमा पर्यटक बढ्ने अपेक्षा व्यवसायीले गरेका छन् । अग्रिम बुकिङको ट्रेन्डले यस्तै संकेत गर्ने व्यवसायीहरुको भनाइ छ ।

होटल व्यवसायीहरुको छाता संगठन होटल संघ नेपाल (हान)का प्रथम उपाध्यक्ष विनायक शाहका अनुसार अक्टोबर–डिसेम्बरका लागि उत्साहजनक रुपमा प्रि–बुकिङ भइरहेको छ ।

‘हामीले व्यवस्थापन मात्र गर्न सक्यौं भने आगामी सिजनमा उत्साह आउने देखिन्छ,’ उनी भन्छन्, ‘प्रि–बुकिङले यस्तै संकेत गरेको छ ।’

वर्षायाममा भारतीय पर्यटकको उत्साहजनक आगमनले होटल र पर्यटनमा राम्रो पुनरुत्थान भइरहेको समेत उनले जानकारी दिए । पोखरामा हवाई र स्थलमार्गबाट आउने पर्यटकका कारण राम्रो व्यापार भइरहेको उनले जानकारी दिए ।

जुलाई २०२२ को एक महिनामा भित्रिएका कुल ४४ हजार ४६२ मध्ये ३८.९ प्रतिशत भारतीय छन् । अर्थातः एक महिनामा १७ हजार २९९ जना भारतीय पर्यटक नेपाल आएको नेपाल पर्यटन बोर्डको तथ्यांकले देखाएको छ ।

चिनियाँ पर्यटकको प्रतिक्षा

कोरोना महामारीको चौथो लहरमा बढ्दो संक्रमित संख्याले भने व्यवसायीमा केही निरासा उत्पन्न गरेको छ । यद्दपि विश्वव्यापी खोप अभियानले पर्यटकका आत्मविश्वास भने बढाएको शाहले बताए ।

‘हामीले चीनबाट निर्वाध पर्यटक आउने वातावरण निर्माणको अपेक्षा गरेका छौं,’ उनले भने, ‘हालै भएको परराष्ट्र मन्त्री ज्यूको भ्रमणले पनि यो वातावरण बनाएको हामीले विश्वास गरेका छ ।’
चिनियाँ पर्यटक आउने वातावरण बन्ने हो भने भैरहवाको गौतमबुद्ध अन्तर्राष्ट्रिय विमानस्थलमा थप जहाज आउने वातावरण बन्ने उनको भनाइ छ ।

जुलाई २०२२ मा १ हजार ५९३ जना चिनियाँ पर्यटक नेपाल भ्रमणमा आएका छन् । यो कोरोना कालयता कै सबैभन्दा धेरै हो ।

चिन्ता नेपाल एयरलाइन्सको सेवाप्रति

वरिष्ठ पर्यटन तथा होटल व्यवसायी योगेन्द्र शाक्यका अनुसार विगतमा नेपाल आउने यात्रुमध्ये ६० प्रतिशतसम्म नेपाल एयरलाइन्सले बोक्ने गथ्र्यौ । त्यसमध्ये अधिकांश पर्यटक हुन्थे । अहिले नेपाल एयरलाइन्सको बजार हिस्सा १० प्रतिशत भन्दा पनि कममा खुम्चिएको छ ।

यो संस्था सुधार गर्न नसक्दा नेपालले पर्यटकीय स्रोत भएका मुलुकमा आफ्नो ध्वजाबाहक वायुसेवा कम्पनीको सेवा पु¥याउन सकेको छैन । यसले ठूलो सम्भावनाका वावजुत पर्यटक आउन नसकेको उनको भनाई छ ।

नेपाल एयरलाइन्स जति बलियो भयो, त्यति नै नेपालमा पर्यटक आउने वातावरण बन्ने उनको भनाइ छ । सरकारले नेपाल एयरलाइन्सको सुदृढीकरण र यूरोपेली यूनियनको कालोसूची हटाउन पहल गर्नुपर्ने सुझाव समेत उनको छ ।

पोखरा र गौतमबुद्ध विमानस्थलबाट अपेक्षा

सरकारले १ जनवरी २०२३ बाट पोखरा अन्तर्राष्ट्रिय विमानस्थल सञ्चालनको घोषणा गरेको छ । यसले पोखरामा पर्यटक बढ्ने अपेक्षा पर्यटन र होटल व्यवसायीले गरेका छन् ।

आगामी पर्यटकीय सिजनकमा गौतमबुद्ध विमानस्थलमा थप जहाज आउने प्राधिकरणले जनाएको छ । अहिले जजिरा एयरवेजले मात्र उडान गरिरहेको यो विमानस्थलमा सेप्टेम्बरबाट विज एयरले उडानको तयारी गरिरहेको छ । यो कम्पनीले आवुधावीबाट उडान गर्न अनुमति मागेको छ ।

बढ्दैछ पर्यटक आगमन

कोरोना महामारीका कारण लगातार दुई वर्ष (सन् २०२० र २०२१ ) झन्डै शून्यमा झरेको पर्यटक आगमन सन् २०२२ पछि भने सुधारोन्मुख रहेको हो ।

जुलाई २०२२ मा ४४ हजार ४६२ जना पर्यटक नेपाल आएका छन् । यससहित सन् २०२२ को ७ महिनाको अवधिमा कुल २ लाख ८५ हजार ३६३ जना पर्यटक नेपाल आएका छन् । कोरोना महामारी आउनु अगाडि सन् २०१९ को ७ महिनाको अवधिमा ६ लाख १२ हजार ७६४ जना पर्यटक आएका थिए ।

सन् २०२२ मा कुन महिनामा कति पर्यटक आए ?

  • जुलाई : ४४ हजार ४६२
  • जुन : ४६ हजार ९५७
  • मे : ५३ हजार ६०८
  • अप्रिल : ६१ हजार ५८९
  • मार्च : ४२ हजार ६
  • फेब्रुअरी : १९ हजार ७६६
  • जनवरी : १६ हजार ९७५

 

लेखकको बारेमा
अच्युत पुरी

आर्थिक पत्रकारितामा सक्रिय पुरी पर्यटन तथा नागरिक उड्डयन विषयमा कलम चलाउँछन् ।

यो खबर पढेर तपाईलाई कस्तो महसुस भयो ?
Khusi chhu

खुसी

Dukhi chhu

दुःखी

Achammit chhu

अचम्मित

Utsahit Chhu

उत्साहित

Akroshit Chhu

आक्रोशित

प्रतिक्रिया

भर्खरै पुराना लोकप्रिय
Advertisment

छुटाउनुभयो कि ?