+
+
कविता :

बुबा! हजुरको मुख हेर्दैछु

यो पालिलाई त जसोतसो

हजुरको फोटो जुटाए

अर्को साल पनि त मुख हेर्नुपर्छ

एउटा फोटो पठाउन नभुल्नु फेरि

त्यसैले आजै यो पत्र कोर्दैछु 

हो बुबा !

फेसबुक बाटै हजुरको मुख हेर्दैछु ।

शंकर अविवेकी शंकर अविवेकी
२०७९ भदौ ११ गते ९:४६

बुबा,

आज कुसे औंशी

हजुरको मुख हेर्ने दिन

त्यसैले,

फेसबुकमा फोटो राखेको छु

वालमा महिमा गाएको छु

हजुरको गुनगानमा

सम्झनामा

सबै सबै वाल भरेको छु

प्रोफाइलमा पनि हजुरकै फोटो फेर्दैछु

हो बुबा !

मैले हजुरको मुख हेर्दैछु ।

 

जिम्मेवारीको भारी बोक्दा झरेको केस

अभावै अभावले चाउरिएको गाला

खोरिया खोस्रिंदा खिएको नङ्ग्रा

उकाली ओराली गर्दा फुटेका पैताला

मलाई हुर्काउँदा झरेको पसिना

पढाउँदा लागेको ऋण

म परदेशिंदा खसेको आँसु

सबैको एक मुष्ट गुन तिर्दैछु

हो बुबा !

फेसबुकबाटै हजुरको मुख हेर्दैछु ।

 

आज अनायासै हजुरको याद आएको छ

सञ्चो बिसञ्चो सोध्न मन लागेको छ

आफ्नै हातले मीठो मसिनो खुवाउन

खाडीको दौरा सुरुवाल

अल्लोको स्टकोट

बार हाते पटुकी

खुट्टामा जुत्ता

शीरमा ढाका टोपी

एकथान दाप खुकुरी

सबै किनिदिन मन लागेको छ

शहरको व्यस्त दैनिकीमा

भोलि बिर्सिन पनि त सक्छु

त्यसैले आजै घोषणा गर्दैछु

हो बुबा!

फेसबुकवाटैं हजुरको मुख हेर्दैछु ।

 

हजुरको फोटो

धेरैले मनपराएका छन्

धेरैले गुनगान गाएका छन्

मैले धेरै लाइक कमाएको छु

मैले कमाउनु भनेको त

तपाईंको पनि गर्वको कुरा होइन् र?

यो पालिलाई त जसोतसो

हजुरको फोटो जुटाए

अर्को साल पनि त मुख हेर्नुपर्छ

एउटा फोटो पठाउन नभुल्नु फेरि

त्यसैले आजै यो पत्र कोर्दैछु

हो बुबा !

फेसबुक बाटै हजुरको मुख हेर्दैछु ।

यो खबर पढेर तपाईलाई कस्तो महसुस भयो ?
Khusi chhu

खुसी

Dukhi chhu

दुःखी

Achammit chhu

अचम्मित

Utsahit Chhu

उत्साहित

Akroshit Chhu

आक्रोशित

प्रतिक्रिया

भर्खरै पुराना लोकप्रिय
Advertisment

धेरै कमेन्ट गरिएका

छुटाउनुभयो कि ?