+
+

रवीन्द्र मिश्र राप्रपा गएपछि मिलन पाण्डे समूहसँग विवेकशीलले थाल्यो छलफल

अनलाइनखबर अनलाइनखबर
२०७९ असोज १३ गते १४:१७

१३ असोज, काठमाडौं । विवेकशील साझा पार्टीका अध्यक्ष रवीन्द्र मिश्र पक्ष राष्ट्रिय प्रजातन्त्र पार्टीमा गएपछि विवेकशील साझा पार्टीले पूर्वसहकर्मीहरुसँग एकताका लागि छलफल थालेको छ ।

मिश्रले राजसंस्थाको वकालत गर्दै संघीयता खारेजी र धर्मनिरपेक्षतामा जनमत संग्रह हुनुपर्ने मागसहितको ‘मार्ग परिवर्तन’ दस्तावेज ल्याएपछि चर्किएको संघर्षका बेला संयोजक मिलन पाण्डेको नेतृत्वमा एउटा समूह पार्टीबाट अलग भएको थियो ।

हाल विवेकशील साझा पार्टीमा प्रवक्ता रहेका प्रकाशचन्द्र परियार भन्छन्, ‘मिलन पाण्डेजीहरुले पहिले जुन माग उठाएर संघर्ष गरिरहनुभएको थियो, त्यो विषय उठाउने व्यक्ति नै यहाँ नरहेपछि स्वतः हामी एक ठाउँ भइसक्यौं ।’

उनले अब पार्टीमा कोही राजतन्त्रवादी बाँकी रहे उनीहरुलाई कारबाही गरिने बताए । ‘पाण्डेजीहरुले जुन कुरामा आवाज उठाउनुभएको थियो, त्यसको नेतृत्व र त्यो अपेक्षा राख्ने मान्छे नै यहाँ नभएपछि त्यो स्वतः कारबाही भइसकेको छ,’ परियारले भने, ‘अब मिलेर वैकल्पिक राजनीतिलाई अघि बढाउँछौं ।’

४ मंसिरमा हुने प्रदेशसभा र प्रतिनिधिसभा चुनावलाई लक्षित गरेर विवेकशील साझा पार्टीलाई वृहत वैकल्पिक शक्तिको केन्द्र बनाउन अन्य समूहहरुसँग पनि छलफल भइरहेको उनले बताए ।

‘पार्टीमा विगतदेखि रहनुभएका साथीहरु, सुशासन पार्टीका रमेश खरेल, लौरो अभियानका सुमन सायमी लगायतलाई पनि बोलाएर छलफल गर्दैछौं’, परियारले भने, ‘विवेकशील र साझा पार्टीबीच दोस्रो पटक एकता हुँदा बाहिर रहनुभएका साथीहरुसँग पनि छलफल गर्दैछौं ।’

राजसंस्था पुनर्स्थपनाको एजेन्डा बोकेका मिश्र पक्षबाहेक अन्य नेताहरु आफूहरुसँगै रहेकाले पार्टीलाई उनको राप्रपा प्रवेशले असर नगर्ने उनले बताए । प्रवक्ता परियारले भने, ‘पुरानै एजेण्डामा प्रतिबद्ध छौं, छिट्टै वृहत ध्रुवीकरण बनाउँछौं ।’

यो खबर पढेर तपाईलाई कस्तो महसुस भयो ?
Khusi chhu

खुसी

Dukhi chhu

दुःखी

Achammit chhu

अचम्मित

Utsahit Chhu

उत्साहित

Akroshit Chhu

आक्रोशित

प्रतिक्रिया

भर्खरै पुराना लोकप्रिय
Advertisment

छुटाउनुभयो कि ?