ओरालो यात्रा

घटेको छ

तिमीप्रतिको सम्मोहन घटेको छ

तिम्रो ऊर्जा घटेको छ

घटेको छ शक्ति,  सामर्थ्य घटेको छ

मुहारको कान्ति र सौन्दर्य घटेको छ

नघटोस् पनि कसरी ?

हरचिजको सीमा हुन्छ

आउँछ

आँगन पनि परदेश हुने बेला आउँछ

तिमी त झन्

अपसकूनहरूले घेरिएका छौ भान्छामै

आँगनसम्म पुग्नै कठिन छ

भो भैगो, पुग्यो यार, पुग्यो

कति रहरैरहरमा

अझै ओरालो लाग्छौ

न पुराना खुसी छन्

न छ आकर्षण नयाँलाई

मात्रै लोभीपापीको झुण्ड सँगालेर

यो अनन्त सौर्ययात्रा कसरी सम्भव छ ?

तिमीलाई भन्दैनन् कसैले ?

तिमी ओरालो यात्राको चौतारीमा छौ

पर्ख

थकाइ मार

सुस्ताऊ त्यही चौतारीमा

र बलियो भरिया खोज

फेरि पनि भारी आफैं बोक्यौ भने

त्यही भारीले थिचिएर थलिने छौ

र

भारीसँगै देश ओरालो झर्ने छ ।।