ठोरीको विकट गाउँ शिकारीबासमा निःशुल्क वाईफाई

३ माघ, वीरगञ्ज पर्साको ठोरी गाउँपालिका–३ शिकारीबासमा निःशुल्क वाइफाई सेवा प्रदान गरिएको छ । शिकारीबासमा पिडीएस नामक कम्पनीको वाइफाइ जडान गरिएको हो ।

शिकारीबासमा यसअघि कुनैपनि सञ्चार सेवा पुग्न सकेको थिएन । एक कल फोन गर्न पनि अग्लो रुखमा चढेर टावर सर्च गर्नुपर्ने बाध्यता थियो ।

गाउँपालिका अध्यक्ष लालबहादुर श्रेष्ठले शिकारीबासमा निःशुल्क वाईफाई सेवा शुरु गरिएको जानकारी दिए । ‘शिकारीबासका नागरिक सञ्चार सेवाबाट वञ्चित थिए’, उनले भने ‘सञ्चार सेवाको भरपुर उपयोग गर्न पाउन भन्ने उद्देश्यले वाईफाई जडान गरेका छौं ।’

टेलिफोनको राम्रो सुविधा नभएको ठाउँमा इन्टरनेट सेवा सुरु भएपछि देशविदेशमा रहेका आफन्तसँग कुराकानी गर्न सहज भएको स्थानीय सन्दीप बस्नेतले बताए ।