कुलतमा फसेका २० युवालाई निशुल्क विद्युत जडान तालिम

१६ माघ, हेटौंडा । लागु औषधको कुलतमा परी विभिन्न सुधार केन्द्रमा रहेका युवाका लागि हेटौंडामा विद्युत जडानसम्बन्धी तालिम सुरु भएको छ ।

हेटौंडा उपमहानगरपालिकाको आर्थिक सहयोगमा व्यवसायीक तथा सिप विकास तालिम केन्द्र र मकवानपुर रिकभरि समूहले तालिम सञ्चालन गरेको हो ।

तालिमको सोमबार हेटौंडा उपमहानगरपालिकाका नगर प्रमुख मीनाकुमारी लामाले उद्घाटन गरिन् । तीन महिनासम्म चल्ने तालिममा व्यवसायिक तथा सीप विकास तालिम केन्द्रका महेश आचार्यले प्रशिक्षण दिनेछन् ।

हेटौंडा उपमहानगरपालिकाकी मेयर मीना लामाले तालिमका सहभागीलाई सीप सिकेपछि रोजगारीको लागि उपमहानगरले पहल गर्ने बताइन् । यो तालिमले स्वरोजगार हुन समेत मद्दत गर्ने उल्लेख गर्दै उनले कुलत त्यागेर आफूले सिकेको सीपलाई आर्थिक उपार्जन कार्यमा उपयोग गर्न अनुरोध गरिन् ।