सिन्दूर हालेर न्युयोर्क फेसन वीकको र्‍याम्पमा प्रस्तुत भए सुन्दरी (तस्वीर)

काठमाडौं । नेपाली-अमेरिकी फेसन डिजाइनर प्रबल गुरुङले न्युयोर्क फेसन वीक-२०२३ मा सिन्दूरलाई प्रस्तुत गरेका छन् । गुरुङको विन्टर कलेक्सनलाई प्रस्तुत गर्न मोडलहरुले सिन्दूर लगाएर र्‍याम्प नापे । सिन्दूरलाई विवाहित हिन्दू महिलाले लगाउने गर्छन् ।

पहिरनसँग मिल्दोजुल्दो ढंगले गुलाबी, कालो र सेतो रङको सिन्दूर लगाएर मोडललाई प्रस्तुत गर्दै रङसँग खेल्न खोजे । डिजाइनर गुरुङले आफ्नो उत्कृष्ट संग्रहको माध्यमबाट बौद्ध दर्शन ‘अनिच्छा’को अवधारणाको खोजी गरे जसको अर्थ नश्वरता हो । साथै, गुरुङको कलेक्सन आफ्नो मातृभूमि नेपालप्रति पनि लक्षित छ ।

‘नेपालमा हामी सधैं यसको बारेमा कुरा गर्छौं, अहिले के छ र यो कति चाँडो जान सक्छ,’ गुरुङले स्टेज पछाडि गरिएको एक अन्तर्वार्तामा एसोसिएटेड प्रेसलाई भने, ‘त्यहाँ वास्तवमा आशावाद छ, विशेषगरी यो चुनौतीपूर्ण समयमा ।’ अँध्यारो समयमा आशा खोज्दै यस्तो डिजाइन प्रस्तुत गरिएको गुरुङले बताए ।

रोयटर्ससँग कुरा गर्दै प्रवलले भने, ‘म नेपाल फर्कन चाहन्थें किनभने तपाईंलाई थाहा छ, त्यहाँ आध्यात्मिक सम्बन्ध र पुनर्सम्बन्ध छ ।’ कोभिड-१९ को महामारीका कारण गुरुङ अन्ततः नेपाल भ्रमण र आमाको सुझावपछि १० दिन लामो मौन व्रतमा सामेल भए । गुरुङले रनवे शोको लागि त्यहाँ अनुभव गरेका रातलाई सिर्जनामा उतार्न चाहन्थे ।

‘यदि मैले तिनीहरूलाई १५-२० मिनेट दिन सक्छु भने त्यो उनीहरुका लागि एकप्रकारको छुटकारा पनि हो । तिनीहरु यहाँ आउन सक्छन् र उनीहरुलाई लाग्न सक्छ कि उनीहरु न्युयोर्कमा छैनन् । म त्यो ठाउँ सिर्जना गर्न चाहन्छु,’ गुरुङले रोयटर्सलाई भने ।

फेब्रुअरी १५ मा सम्पन्न भएको न्युयोर्क फेसन वीकमा यसपटक ७० डिजाइनरले आफ्नो संग्रह प्रस्तुत गरेका थिए ।

तस्वीर सौजन्य : प्रबल गुरुङ