चितवन राष्ट्रिय निकुञ्जमा गैंडा मृत फेला

२५ फागुन, चितवन । चितवन राष्ट्रिय निकुञ्जमा गैंडा मृत फेला परेको छ ।

निकुञ्ज कार्यालयले दिएको जानकारी अनुसार निकुञ्जको अमलटारी सेक्टरअन्तर्गत सेरी पोष्ट नजिक निकुञ्जको कोर क्षेत्रमा अन्दाजी २० बर्षको भाले गैंडा मृत फेला परेको जनाएको छ ।

बुधबार बिहान गस्तीका क्रममा खाग र खुर सुरक्षित अवस्थामा रहेको गैंडा मृत फेला परेको निकुञ्जका सूचना अधिकारी गणेशप्रसाद तिवारीले जानकारी दिए ।

गैंडा आपसमा जुँधेर मरेको हुनसक्ने निकुञ्जको अनुमान छ । चालु आर्थिक वर्षमा निकुञ्ज र मध्यवर्ती क्षेत्रमा १३ गैंडा मृत फेला परेका छन् । ती मध्ये ३ गैंडा चोरी सिकारीले मारेका हुन् ।