चर्चामा ‘छक्कापञ्जा ४’का दुई गीत, दीपाश्री भन्छिन्- नाच्‍न मिल्ने भएकाले सबैले रुचाए

काठमाडौं । ‘छक्कापञ्जा’ सिरिजले बक्स अफिसको गणितमा मात्र होइन, संगीत पक्षमा समेत आफूलाई ब्लकबस्टर बनाएको छ । फिल्म श्रृंखलामा समावेश प्रायः शीर्ष गीतहरुले युट्युबमा करोडौं भ्युज पाइरहेका छन् । पहिलो भाग रहेको राजनराज सिवाकोटीद्वारा संगीतबद्ध ‘पूर्वपश्चिम रेल’लाई युट्युबमा ६ करोड पटक हेरिएको छ ।

‘देख न चम्पा’लाई एक करोड पटक हेरिएको छ । तेस्रो श्रृंखलामा समावेश ‘पहिलो नम्बरमा’लाई ६ करोड पटक हेरिएको छ । ‘पछि कालै पल्किन्छ’लाई १ करोड २० लाख, ‘पहिलो नम्बर’लाई १ करोड ४ लाख पटक हेरिएको छ । सिरिजमा समावेश नभएपनि दीपक–दीपाकै फिल्म वडा नम्बर ६ को गीत ‘सुर्के थैली खै’लाई ५ करोड २२ लाख भ्युज पाएको छ ।

हलमा चलिरहेको ‘छक्कापञ्जा ४’का दुई गीतले यतिबेला सांगीतिक बजार पिटिरहेका छन् । ‘दर्शन सलाम’लाई १ करोड २३ लाख र ‘सिरुपाते जुँगामा’लाई ३१ लाख पटक हेरिएको छ । बाबुल गिरीद्वारा संगीतबद्ध गीत ‘सिरुपाते जुँगामा’ रिलिजको दुई सातादेखि लगातार युट्युब ट्रेन्डिङको नेपालतर्फ शीर्षस्थानमा छ । लगातार दुई साता ट्रेन्डिङको शीर्षस्थानमा रहनु कुनै गीतका लागि दुर्लभ उपलब्धि हो । झनै, पाश्र्वगीतका लागि त अति नै महत्वपूर्ण । टिकटक, विवाह संस्कार र भोजमा समेत यो गीत घन्किंदा यो ट्रेन्डिङमा कायमै छ ।

सरल र मुखैमा झुण्डिने शब्द रहेको यो गीतलाई गिरीले सुदूरपश्चिमको शैलीलाई फ्युजन गरेर कम्पोज गरेका छन् । लय र शब्द बेजोड हुँदा यसले टिकटकमा स्थान पाएको छ । अर्कोतर्फ, छक्कापञ्जा ब्रान्डको कारणले पनि समावेश गीतले करोड भ्युज मात्र होइन, राम्रो प्रवद्र्धनको मौका पाएका छन् ।

यो पनि पढ्नुहोस

दोहोर्‍याएर लय नभर्ने बाबुल, जनजिब्रोका शब्द कोर्न सिपालु घायल

‘छक्कापञ्जा’ निर्मात्री तथा अभिनेत्री दीपाश्री निरौला दर्शकलाई सुन्दा रमाइलो लाग्ने, मेलोडी भएको नाच्न मिल्ने खालका आधार हेरेर गीत छनोट गर्ने बताउँछिन् । ‘दर्शन सलाम गीत छक्कापञ्जाकै फ्लेभर आओस् भनेर छानेका हौं । चार वर्षअघिको गीत हो यो । संगीतकारले पनि हाम्रै लागि भनेर धैर्य गर्नुभयो,’ निरौलाले अनलाइनखबरसँग भनिन् ।

‘सुरुमा त आफैंलाई मन पर्नुपर्‍यो । त्यसपछि टिममा सल्लाह गर्छौं,’ दीपाश्री भन्छिन्, ‘प्राप्त चार–पाँचवटा अन्य गीतबाट सिरुपातेलाई छानेका हौं । लभको प्लट पनि विकास होस् र कथा पनि अघि बढोस् भनेर यो गीतलाई छानेका हौं । यो गीत सुन्ने बित्तिकै छोयो । मेलोडी राम्रो लाग्यो,’ उनी भन्छिन् । अहिले टिकटक, फेसबुक र इन्स्टाग्रामका रिल्समा यो गीत भाइरल बनिरहेको छ । गीतलाई रुचाइदिएकोमा दीपाश्रीले दर्शकलाई धन्यवाद समेत दिइन् ।