वडा कार्यालयको जग खन्दा अनामनगरमा तनाव

२९ जेठ, काठमाडौं । काठमाडौं महानगरपालिका वडा नम्बर २९ को वडा कार्यालय निर्माणका लागि जग खन्दा अनामनगर क्षेत्रमा तनाव भएको छ । सार्वजनिक जग्गामा वडा कार्यालयको जग खनेको भन्दै स्थानीय वासिन्दाले विरोध जनाएपछि तनाव भएको हो ।

जिल्ला प्रहरी परिसर काठमाडौंका प्रहरी उपरीक्षक मनोज लामिछानेले वडा कार्यालयको जग हाल्दा स्थानीयले विरोध गरेकाले केहीबेर तनाव भएको बताए । ‘जग खन्न डोजर ल्याएपछि स्थानीयले विरोध गरेका थिए, लामो समयदेखि वडा कार्यालयको लागि उक्त सावजनिक जग्गा प्रयोग गर्ने तयारी गरिएको थियो, सोही अनुसार आज जग खनिएको हो ।’

वडा सदस्य सन्तोष ढुंगेलका अनुसार नगर सभाले पास गरेको स्थानमा वडा कार्यालयको भवन निर्माण गर्दा केही स्थानीय वासिन्दाले विरोध गरेका हुन् ।

‘गोरखा एफएम चोकको ८ नम्बर कित्तामा वडा भवन बनाउने भनेर नगर सभाले पास गरेको थियो । यो ठाउँमा बनाउन हुँदैन भनेर केही स्थानीय आएर विरोध गरेका हुन् तर जग खन्ने काम भइरहेको छ’, ढुंगेलले भने ।

हेर्नुहोस् भिडियो