विश्वकप क्रिकेटको उपाधिका लागि भारत र अष्ट्रेलिया आज भिड्दै

३ मंसिर, काठमाडौं । आईसीसी क्रिकेट विश्वकपको उपाधिका लागि घरेलु टोली भारत र अष्ट्रेलियाबीच आज प्रतिस्पर्धा हुँदैछ ।

फाइनल खेल अहमेदवादस्थित नरेन्द्र मोदी स्टेडियममा नेपाली समय अनुसार दिउँसो सवा २ बजे सुरु हुनेछ ।

भारतले पहिलो सेमिफाइनलमा न्युजिल्याण्डलाई ७० रनले पराजित गर्दै १२ वर्षपछि एकदिवसीय विश्वकपको फाइनलमा स्थान बनाएको हो ।

यस्तै अष्ट्रेलियाले दोस्रो सेमिफाइनलमा दक्षिण अफ्रिकालाई तीन विकेटले पराजित गर्दै भारतसँग फाइनल भेट पक्का गरेको थियो ।

फाइनल पुग्ने क्रममा अपराजित भारतले १० मध्ये १० वटै खेल जितेको थियो । यस्तै लिग चरणमा सुरुवाती दुई खेलमा पराजित अष्ट्रेलियाले त्यसपछि लगातार ७ खेल जितेर सेमिफाइनलमा पुगेको थियो ।

लिगमा तेस्रो भएको अष्ट्रेलियाले दोस्रो भएको दक्षिण अफ्रिकालाई पराजित गर्दै ८ वर्षपछि फाइनल पुगेको हो ।

विश्वकप क्रिकेटको सर्वाधिक सफल अष्ट्रेलियाले कीर्तिमानी पाँच पटक उपाधि जितेको छ भने भारतले दुई पटक उपाधि जितेको छ ।

यसअघि सन् २००३ मा यी दुई टोली फाइनलमा भिड्दा अष्ट्रेलियाले जित हात पारेको थियो । त्यसबेला अष्ट्रेलिया अपराजित रहँदै फाइनल पुगेको थियो ।

यस पटक त्यसको ठीक विपरीत भारत अपराजित रहँदै फाइनल पुगेको छ । भारतलाई घरेलु मैदानमा त्यस हारको बदला लिने मौका समेत छ ।

तर अष्ट्रेलियाको लागि पनि फाइनलमा भारतविरुद्ध लिग चरणमा बेहोरेको हारको बदला लिने अवसर छ । भारतले यस पटक उत्कृष्ट प्रदर्शन गर्दै सबै खेल जितेको थियो । तर अष्ट्रेलियाले खराब सुरुवात गरेपनि त्यसपछिका खेलमा आफ्नो वास्तविक खेल प्रदर्शन गर्दै फाइनलसम्म पुगेको छ । त्यसैले फाइनल खेल प्रतिस्पर्धात्मक हुने अनुमान छ ।

अष्ट्रेलियाले यसअघि १९८७, १९९९, २००३, २००७ र २०१५ मा उपाधि जितेको थियो भने भारतले १९८३ र २०११ मा उपाधि जितेको थियो ।

यसअघि ७ पटक फाइनल खेलिसकेको अष्ट्रेलिया १९७५ मा वेष्ट इन्डिज र १९९६ मा श्रीलंकासँग भने फाइनलमा पराजित भएको थियो । भारत भने फाइनलमा २००३ मा अष्ट्रेलियासँगै पराजित भएको थियो ।

भारत र अष्ट्रेलियाबीच अहिलेसम्म कुल १५० वटा एकदिवसीय खेल भएको छ । जसमा अष्ट्रेलियाले ८३ वटा खेल जितेको छ भने भारतले  ५७ वटा जितेको छ । बाँकी १० खेलमा नतिजा आएको थिएन ।

यस्तै भारत र अष्ट्रेलियाबीच विश्वकपमा १३ खेल भएकोमा अष्ट्रेलियाले ८ खेल जित्दा भारतले ५ खेल मात्र जितेको छ ।

भारतको फाइनल यात्रा

अष्ट्रलियाविरुद्ध ६ विकेटले विजयी

अफगानिस्तानविरुद्ध ८ विकेटले विजयी

पाकिस्तानविरुद्ध ७ विकेटले विजयी

बंगलादेशविरुद्ध ७ विकेटले विजयी

न्युजिल्याण्डविरुद्ध ४ विकेटले विजयी

इंग्ल्याण्डविरुद्ध १०० रनले विजयी

श्रीलंकाविरुद्ध ३०२ रनले विजयी

दक्षिण अफ्रिकाविरुद्ध २४३ रनले विजयी

नेदरल्याण्ड्सविरुद्ध १६० रनले विजयी

सेमिफाइनल : न्युजिल्याण्डविरुद्ध ७० रनले विजयी

अष्ट्रेलियाको फाइनल यात्रा

भारतविरुद्ध ६ विकेटले पराजित

दक्षिण अफ्रिकाविरुद्ध १३४ रनले पराजित

श्रीलंकाविरुद्ध ५ विकेटले विजयी

पाकिस्तानविरुद्ध ६२ रनले विजयी

नेदरल्याण्ड्सविरुद्ध ३०९ रनले विजयी

न्युजिल्याण्डविरुद्ध ५ रनले विजयी

इंग्ल्याण्डविरुद्ध ३३ रनले विजयी

अफगानिस्तानविरुद्ध तीन विकेटले विजयी

बंगलादेशविरुद्ध ८ विकेटले विजयी

सेमिफाइनल : दक्षिण अफ्रिकाविरुद्ध तीन विकेटले विजयी