२०८३ असोज ६ गते १७:१७ 
News Summary
Generated by OK AI. Editorially reviewed.- २०औं एसियन गेम्सको टेबलटेनिस मिक्स्ड डबल्समा रुविन महर्जन र इभाना थापा दोस्रो चरणमा प्रवेश गरेका छन् ।
- रुविन–इभाना जोडीले जापानको स्काई हल टोयोटामा पाकिस्तानका मोहम्मद खान र कलसुम खानलाई ३–० को सोझो सेटमा हराएको छ ।
- सोही स्पर्धामा नविता श्रेष्ठ र सन्योग कपाली मंगोलियाका बिल्गुन अन्खबयार र अन्खमा सेर–ओदसँग ३–१ ले पराजित भएर पहिलो चरणबाटै बाहिरिएका छन् ।
६ असोज, काठमाडौं । २०औं एसियन गेम्सअन्तर्गत टेबलटेनिस मिक्स्ड डबल्समा नेपालका रुविन महर्जन र इभाना थापा दोस्रो चरणमा प्रवेश गरेका छन् ।
जापानको स्काई हल टोयोटामा मंगलबार भएको पहिलो चरणको खेलमा रुविना–इभाना जोडीले पाकिस्तानका मोहम्मद खान र कलसुम खानको जोडीलाई ३–० को सोझो सेटमा पराजित गर्यो ।
रुविना–इभाना जोडीले पहिलो सेट ११–६, दोस्रो सेट ११–८ र तेस्रो सेट ११–४ ले आफ्नो पक्षमा पार्यो । यो जितसँगै यो जोडी दोस्रो चरणमा प्रवेश गरेको छ । दोस्रो चरणमा रुविना–इभाना जोडीले हङकङका क्वान तो याउ र विङ लाम ङको जोडीसँग प्रतिस्पर्धा गर्नेछन् ।
सोही विधामा नेपालको नविता श्रेष्ठ र सन्योग कपालीको जोडी भने पराजित भएको छ । नविता–सन्योग जोडी मंगोलियाका बिल्गुन अन्खबयार र अन्खमा सेर–ओद जोडीसँग ३–१ ले पराजित हुन पुग्यो ।
पहिलो सेट ११–२ को शानदार जित निकालेको नविता–सन्योग जोडी त्यसपछि सम्हालिन सकेन । दोस्रो सेट र तेस्रो सेट समान ११–६ र चौथो सेट ११–९ ले गुमाउन पुग्यो ।
हारसँगै नविता–सन्योग जोडी पहिलो चरणबाटै बाहिरियो ।
प्रतिक्रिया 4