केदारनाथ शर्माको शिवशिखर र तुलसी सहकारीमा बचतकर्ताको साढे १२ अर्बको मागदाबी

४ चैत, काठमाडौं । समस्याग्रस्त शिवशिखर बहुउद्देश्यीय सहकारी संस्थामा ११ अर्ब रुपैयाँभन्दा बढीको माग दाबी परेको छ ।

समस्याग्रस्त सहकारी व्यवस्थापन समितिले अनलाइन मागदाबी मार्फत प्रमाणसहित दाबी पेस गर्न सहकारीका बचतकर्तालाई आह्वान गरेको थियो ।

उक्त सूचना अनुसार ३२ हजार ५ सय बचतकर्ताको ११ अर्ब रुपैयाँ मागदाबी परेको समितिका सदस्यसचिव केशवप्रसाद पौडेलले बताए ।

सहकारी विभागको सिफारिसमा भूमि व्यवस्था, सहकारी तथा गरिबी निवारण मन्त्रालयले  शिवशिखर बहुउदद्देश्यीय सहकारी संस्थालाई २५ भदौ २०८० मा समस्याग्रस्त घोषणा गरेको थियो ।

मन्त्रालयले समस्याग्रस्त घोषणा गरी सम्पत्ति तथा दायित्व फस्र्यौट गर्न समस्याग्रस्त सहकारी व्यवस्थापन समितिमा पठाएको थियो ।

शिवशिखर सहकारी संस्था स्थापना गरी सर्वसाधारणबाट निक्षेप संकलन गरी अपचलन गरेका सहकारीका पूर्वअध्यक्ष केदारनाथ शर्मा पुर्पक्षका लागि थुनामा छन् ।

काठमाडौं केन्द्रीय कार्यालय रहेको सहकारी संस्थाको स्रोत आफ्नो निजी व्यवसायमा  लगानी गरी अपचलन गरेका शर्माले उक्त संस्थाको सञ्चालक समितिमा संस्थाका कर्मचारीलाई जिम्मा दिएर विराटनगरमा तुलसी बहुमुखी सहकारी संस्थाको अध्यक्ष बनेका थिए ।

उक्त सहकारीको स्रोत पनि अपचलन गरेका थिए । तुलसी सहकारी पनि सहकारी विभागको सिफारिसमा सहकारी मन्त्रालयले २५ भदौ २०८० मा नै समस्याग्रस्त घोषणा गरेको थियो ।

समस्याग्रस्त सहकारी व्यवस्थापन समितिले अनलाइन मागदाबीका लागि आवेदन माग गरेकोमा ५ हजार ३ सय ८१ आवेदकले करिब १ अर्ब ४५ करोडको मागदाबी पेस गरेको समस्याग्रस्त सहकारी व्यवस्थापन समितिले जनाएको छ ।

सहकारी संस्था सञ्चालक केदारनाथ शर्मा र उनी आबद्ध कम्पनीहरूको सम्पत्ति खोजी गर्दा अधिकांश सम्पत्ति बैंकबाट कर्जा लिएर रोक्का भएको पाइएको समिति सदस्यसचिव पौडेल बताउँछन् ।

बैंकहरूले उक्त सम्पत्ति लिलाम गर्दा सहकारी ऐनअनुसार गर्नुपर्छ भन्ने प्रस्ताव समितिले राष्ट्र बैंकलाई पठाएको पौडेल बताउँछन् ।

‘राष्ट्र बैंकमा हामीले पत्र पठाए पनि त्यसको कार्यान्वयन भएको छैन । सहकारी सम्बद्ध सम्पत्ति सहकारी ऐनअनुसार लिलामी गर्नुपर्छ भन्ने हो । तर, बैंकहरूमा धितो रोक्का रहेकाले समस्या भएको छ,’ उनले भने ।

उनका अनुसार बैंकमा धितो रोक्का भएको बाहेक सम्पत्ति खासै देखिँदैन । ऋणीको तमसुक तथा फाइल पनि भेटिएको छैन । भेटेसम्मको सम्पत्ति रोक्का गरिएको छ । ‘तर जनशक्ति नहुँदा कार्यालय शिल गर्नसमेत समस्या भएको छ,’ उनले भने ।

सहकारी ठगीमा प्रहरीको केन्द्रीय अनुसन्धान ब्युरो (सीआईबी) ले केदानाथ शर्मालाई पक्राउ गरी अनुसन्धान गर्दा ६ अर्बभन्दा बढी रकम भारत र म्यानम्यार पु¥याएको हुन सक्ने शंकासमेत गरिएको थियो ।

६ अर्ब २५ करोड रुपैयाँ भने शर्माले आफ्ना निजी कम्पनीमा लगानी गरेको सीआईबीले गरेको अनुसन्धानमा खुलेको थियो ।

दुइटा संस्थामा सर्वसाधारणको करिब साढे १२ अर्बको मागदाबी परेको छ । यस्तै उनले सहकारीको स्रोत अपचलन गरी जोडेको सम्पत्ति बैंकमा धितो राखेर साढे ५ अर्बभन्दा बढी विभिन्न बैंकबाट कर्जा लिएका थिए ।

यो पनि पढ्नुहोस

ओरियन्टलभन्दा पाँच गुणा ठूलो शिवशिखर सहकारी घोटाला

यो पनि पढ्नुहोस

शिवशिखरमा केदारनाथको बदमासी : ६ अर्ब अपचलन गरी भारत र म्यानमारमा व्यवसाय विस्तार