निष्क्रिय कर्जा बढेसँगै बैंकहरूको नाफा ४६ अर्ब ३८ करोडमा सीमित

२९ चैत, काठमाडौं । अर्थतन्त्रमा देखिएको शिथिलताबाट बैंकहरूले सम्भावित कर्जा नोक्सानीका लागि गरेको ‘प्रोभिजनिङ’ बढेसँगै नाफा प्रभावित भएको छ ।

चालु आर्थिक वर्ष (आव) २०८०/८१ आठ महिना (साउन–फागुन) सम्म बैंक तथा वित्तीय संस्थाले ४६ अर्ब ३८ करोडमात्र नाफा कमाएको नेपाल राष्ट्र बैंकले जनाएको छ ।

गत आव सोही अवधिमा ५३ अर्ब ६० करोड कमाएका बैंक तथा वित्तीय संस्थाको नाफा चालु आव १५.५७ प्रतिशतले घटेको हो । चालु आव बैंक तथा वित्तीय संस्थाले सम्भावित कर्जा नोक्सानीका लागि ५५ अर्ब ८७ करोड रुपैयाँ प्रोभिजन गरेका छन् ।

गत आव सोही अवधिमा ३६ अर्ब ५५ करोड मात्रै प्रोभिजनिङ गरेकोमा चालु आव प्रोभिजनिङ बढे पनि नाफा घटेको हो ।

एकातिर अर्थतन्त्रमा देखिएको शिथिलताले व्यवसाय बढ्न नसक्दा आम्दानी बढ्न नसक्ने र कर्जा असुली प्रभावित भएर नोक्सानी व्यवस्थ गर्न गरेको प्रोभिजन बढ्दै जाँदा बैंकहरूको नाफा प्रभावित भएको हो ।

चालु आव आठ महिना २० वाणिज्य बैंकले ४२ अर्ब ३१ करोड नाफा आर्जन गरेका छन् । गत आव सोही अवधिमा ४८ अर्ब ८३ करोड नाफा थियो ।

चालु आव मात्रै वाणिज्य बैंकहरूले सम्भावित कर्जा नोक्सानीका लागि ४८ अर्ब ५५ करोड प्रोभिजन गरेका छन् । जसले नाफा प्रभावित भएको हो । जबकि, गत आव वाणिज्य बैंकहरूले सम्भावित कर्जा नोक्सानीका लागि ३० अर्ब ९९ करोड प्रोभिजन गरेका थिए ।

यस्तै विकास बैंकहरूको नाफा आठ महिनामा ३ अर्ब ५१ करोड पुगेको छ । गत आवमा ३ अर्ब ७८ करोड नाफा आर्जन गरेकोमा चालु आव नाफा घटेको छ ।

सम्भावित कर्जा नोक्सानीका लागि गरेको प्रोभिजन बढ्दै जाँदा विकास बैंकहरूको पनि नाफा घटेको छ । गत आव आठ महिनामा विकास बैंकहरूले ४ अर्ब ५३ करोड प्रोभिजन गरेकोमा चालु आव सोही अवधिमा ६ अर्ब ३२ करोड प्रोभिजन गरेका छन् ।

यस्तै वित्त कम्पनी (फाइनान्स) ले चालु आव आठ महिनामा ५६ करोड रुपैयाँ नाफा कमाएको राष्ट्र बैंकले जनाएको छ । गत आव सम्भावित कर्जा नोक्सानीका लागि १ अर्ब १ करोड प्रोभिजन गरेकोमा चालु आव १ अर्ब प्रोभिजन गरेका छन् ।

कस्तो छ पूँजीकोषको अवस्था ?

वाणिज्य बैंकहरूलाई प्राथमिक पूँजीकोषको दबाब बढ्दै गएको छ । फागुन मसान्तमा बैंक तथा वित्तीय संस्थाको प्राथमिक पूँजीकोष अनुपात ९.६३ प्रतिशत रहेको राष्ट्र बैंकले प्रकाशित गरेको तथ्यांकमा छ ।

वाणिज्य बैंकहरूको प्राथमिक पूँजीकोष ९.५५ प्रतिशत मात्रै हुँदा विकास बैंकहरूको ९.६८ प्रतिशत र वित्त कम्पनीहरूको १३.२० प्रतिशत रहेको राष्ट्र बैंकले जनाएको छ ।

माघमा वाणिज्य बैंकहरूको प्राथमिक पूँजीकोष ९.५२ प्रतिशतम्म झरेकोमा फागुनमा केही सुधार भएको छ । गत आव फागुनमा १०.०४ प्रतिशत रहेको वाणिज्य बैंकहरूको प्राथमिक पूँजीकोष अनुपात कर्जा असुली प्रभावित भएर निष्क्रिय कर्जा बढ्दा सञ्चित नोक्सानीमा बैंकहरू गएका छन् । जसले कर्जा विस्तार नहुँदा पनि पूँजीकोष घटेको छ ।

२०७९ फागुन मसान्तमा २.४९ प्रतिशत रहेको वाणिज्य बैंकहरूको निष्कृय कर्जा अनुपात चालु आव सोही अवधिमा आउँदा बढेर ३.६३ प्रतिशत पुगेको राष्ट्र बैंकले जनाएको छ ।

२०७९ फागुन मसान्तमा बैंक तथा वित्तीय संस्थाको कुल पूँजीकोष ६ खर्ब ७२ अर्ब ५६ करोड थियो । २०८० फागुनमा आउँदा ७ खर्ब २१ अर्ब ६४ करोड पुगेको छ । पूँजीकोषमा केही वृद्धि र कर्जा केही बढे पनि असुली प्रभावित भएर बैंकहरू सञ्चित नोक्सानीमा समेत गएको अवस्था छ । जसले पूँजीकोषमा दबाब परेको हो ।

२०८० फागुनमा बैंक तथा वित्तीय संस्थाको कुल चुक्ता पूँजी ४ खर्ब ३६ अर्ब ४१ करोड छ । त्यस्तै वैधानिक जगेडा कोषमा १ खर्ब ४७ अर्ब ९८ करोड छ । यस्तै २९ अर्ब ६५ करोड सञ्चित नोक्सानी रहेको राष्ट्र बैंकले जनाएको छ । यस्तै अन्य जगेडा कोषमा १ खर्ब ६३ अर्ब ८२ करोड रहेको छ ।

जसमध्ये वाणिज्य बैंकहरूको मात्रै कुल पूँजीकोष ६ खर्ब ४५ अर्ब ९७ करोड छ । यस्तै चुक्ता पूँजी मात्रै ३ खर्ब ७९ अर्ब, वैधानिक जगेडा १ खर्ब ३४ अर्ब ९१ करोड र अन्य जगेडामा १ खर्ब ५४ अर्ब ६१ करोड र सञ्चित नोक्सानी २२ अर्ब ५६ करोड रहेको राष्ट्र बैंकले जनाएको छ ।

२०७९ फागुनमा बैंक तथा वित्तीय संस्थाको कुल निक्षेप ६४ खर्ब १५ अर्ब रहेकोमा २०८० फागुनमा ६१ खर्ब ८८ अर्ब पुगेको छ । यस्तै कर्जा लगानी भने ४८ खर्ब ५५ अर्बबाट बढेर ५० खर्ब ९१ अर्ब पुगेको राष्ट्र बैंकले जनाएको छ ।

कुन वाणिज्य बैंकले कति कमाए नाफा ?

चालु आव आठ महिनामा अधिकांश वाणिज्य बैंकको नाफा घटेको छ । गत आव सिभिल बैंकलाई मर्जर गरेको हिमालयन बैंकको नाफा बढेको छ । गत आवा छुट्टाछुट्टै रहेका लक्ष्मी बैंक र सनराइज बैंक मर्जर भएर लक्ष्मी सनराइज बैंक बनेको छ । गत वर्ष दुई बैंकले कमाएको नाफा जोड्दा अहिले नाफा घटेको छ ।

त्यस्तै प्राइम कमर्सियल बैंक, एभरेस्ट बैंक, सिद्धार्थ बैंक र कृषि विकास बैंकको नाफा भने बढेको छ । फागुनसम्म नबिल बैंकले ४ अर्ब ७२ करोड नाफा कमाएको छ । जुन गत आव सोही अवधिको तुलनामा ११.३० प्रतिशतले कम हो। यस्तै ग्लोबल आईएमई बैंकको नाफा २१.४८ प्रतिशतले घटेर ३ अर्ब ४३ करोडमा झरेको छ ।

प्राइम कमर्सियल बैंकको नाफा भने २०.७४ प्रतिशतले बढेर २ अर्ब ८९ करोड पुगेको छ ।

राष्ट्रिय वाणिज्य बैंकको नाफा १४.५८ प्रतिशतले घटेर २ अर्ब ८८ करोडमा अड्दा नेपाल इन्भेस्टमेन्ट मेगा बैंकको नाफा १९.६७ प्रतिशतले घटेर २ अर्ब ८० करोड भएको छ ।

एनआईसी एसिया बैंकको नाफा ३७.३५ प्रतिशतले घटेर २ अर्ब ५४ करोडमा अडेको छ । एभरेस्ट बैंकको नाफा २.६३ प्रतिशतले बढेर २ अर्ब २९ करोड पुगेको छ ।

गत वर्ष फागुनसम्म ४१ करोड मात्रै नाफा रहेको कृषि विकास बैंकको नाफा चालु आव १ अर्ब ९७ करोड पुगेको छ । त्यस्तै सिद्धार्थ बैंकको नाफा पनि ९.१२ प्रतिशतले बढेर १ अर्ब ७० करोड पुगेको छ ।

नेपाल बंैक, नेपाल एसबीआई बैंकको नाफामा भने उच्च गिरावट देखिएको छ । नेपाल बैंकको नाफा ३९ प्रतिशत र एसबीआई बैंकको नाफा ३८.६७ प्रतिशतले घटेर सबैभन्दा कम १ अर्बमा सीमित भएको छ ।