बागमती सरकारले ४३७ टुक्रे योजनामा दियो ६७ करोड बजेट

२ वैशाख, हेटौँडा । बागमती प्रदेश सरकारले चालु आर्थिक वर्ष २०८०/८१ का लागि ६७ करोड रूपैयाँ बराबरका योजना थपेको छ । प्रदेश सरकारले उक्त बजेटअन्तर्गत ४ सय ३७ वटा टुक्रे योजना थप गरेको हो ।

आर्थिक मामिला तथा योजना मन्त्रालयकी उपसचिव लक्ष्मी रिमालका अनुसार मन्त्रालयले अर्थ विविध शीर्षकमा रहेको बजेटबाट खर्च गर्न सकिनेगरी योजना कार्यान्वयनका लागि अरु मन्त्रालयहरुमा पत्राचार गरेको छ ।

‘भैपरी आउने भनी राखिने विविध शीर्षकको रकमबाट खर्च गर्नेगरी योजना थप भएका छन्’, रिमालले भनिन्, ‘मन्त्रालयबाट प्रणालीमा योजना थपिएपछि बजेट उपलब्ध गराउँछौँ ।’

थपिएकामध्ये ३२ करोड रूपैयाँ बराबरको पूर्वाधारका योजना रहेको रिमालको भनाइ छ । भौतिक पूर्वाधार विकास कार्यालयले दिएको जानकारीअनुसार एक सय ६३ योजना १३ वटा कार्यालयबाट कार्यान्वयन गर्नेगरी रु ३२ करोडको योजना थप भएर आएको छ ।

थप गरिएका योजना कुलो, मन्दिर, आर्यघाटदेखि सडक निर्माणसम्म छन् । सबै योजना भौतिक पूर्वाधार विकास मन्त्रालय, खानेपानी, ऊर्जा तथा सिँचाइ, पर्यटन, उद्योग तथा सहकारी, सामाजिक विकास र वन तथा वातावरण मन्त्रालयसँग सम्बन्धित छन् ।

भौतिकमा सडक स्तरोन्नति तथा निर्माण, भवन, कुलो, कल्भर्ट, मन्दिर, आर्यघाट निर्माण तथा मर्मतका लागि योजना थपिएका छन् । खानेपानी, ऊर्जा तथा सिँचाइमा खानेपानीका योजना, तरकारी बजार व्यवस्थापन, पहिरो नियन्त्रण, ढल व्यवस्थापनका टुक्रे योजना छन् ।

पर्यटन मन्त्रालयमा संस्कृति तथा पर्यटकीय क्षेत्रको सम्भाव्यता अध्ययन गर्ने, मन्दिर संरक्षणका कार्यक्रम, गुठी, पाटी, सत्तल, विहारका निर्माण तथा स्तरोन्नति, बालउद्यान निर्माण गर्नेलगायत योजना थप भएको समितिको प्रतिवेदनमा जनाइएको छ ।

सामाजिक विकास मन्त्रालयमा वितरणमुखी बजेट थप भएका छन् । लक्षित वर्गका लागि तालिम, गोष्ठी, सेमिनार, जनचेतनामूलक कार्यक्रम समावेश छन् । साथै विद्यालय सभाहल, शौचालय निर्माण, साना खेलका पूर्वाधार, फर्निचर खरिदलगायत योजना पनि थपिएका छन् ।

वन तथा वातावरण मन्त्रालयको नदी नियन्त्रण तथा पर्खाल निर्माण, शिवपुरी जङ्गल सफारीका लागि पूर्वसम्भाव्यता अध्ययन गर्ने, रानीवनमा टुरिजम पार्क बनाउनेलगायत साना योजना समावेश छन् ।

आर्थिक मामिला मन्त्रालयसँग अर्थ विविध शीर्षकमा चार अर्ब २६ करोड ५० लाख ३ हजार ८५ रुपैयाँ बजेट छ । जसमध्ये चालुतर्फ ३ अर्ब २७ करोड १३ लाख ८३ हजार ८५ रुपैयाँ र पुँजीगततर्फ ९९ करोड ३६ लाख २० हजार रुपैयाँ बजेट रहेको मन्त्रालयका उपसचिव रिमालले जानकारी दिइन् ।