चिनियाँ राष्ट्रपतिको पाँच दिने युरोप यात्रामा के भयो ?

एजेन्सी ।  चिनिँया राष्ट्रपति सी  जिनपिङले आफ्नो पाँच दिने युरोप भ्रमण सकेका छन् । फ्रान्सबाट सुरु भएको युरोप भ्रमण सर्बिया हुँदै हंगेरी पुगेर समाप्त भएको हो । युरोप भ्रमणका क्रममा उनले बहुध्रुवीय विश्व, विश्व व्यापार लगानी र रूस- युक्रेन युद्धबारे छलफल गरेको अलजजिराले उल्लेख गरेको छ ।

फ्रान्स, सर्बिया र हंगेरी तीन राष्ट्रका लागि सीको भ्रमण विशेष महत्व र प्रतीकात्मक किसिमको थियो । फ्रान्स र चीनको कुटनीतिक सम्बन्ध स्थापित भएको ६०औँ वर्षगाँठको अवसरमा सी फ्रान्स पुगे । हंगेरीसँग कुटनीतिक सम्बन्ध स्थापना भएको ७५ औँ वर्षगाँठको अवसर थियो भने सर्बियामा नेटोले चिनिँया दूतावासमा हमला गरेको २५औँ वर्ष पुगेको थियो ।

अमेरिकाको प्रभाव कम भइरहेको र युरोपसँग आफ्नो छवि धुमिल भइरहेको अवस्थामा युरोपेलीसँग सम्बन्ध सुधार र विस्तारका लागि सी भ्रमणमा गएको विश्लेषकहरु बताउँछन् । उनको भ्रमणमा युरोपेली आयोगले व्यापारको विभिन्न आयाम, मानवअधिकार लगायतका विषयमा छलफल गरेको अर्न्तराष्ट्रिय सञ्चार माध्यममा समाचार छ ।

युरोपमा विशेषगरी चीनले विद्युतीय सवारीसाधनमा दिएको अनुदानका कारण युरोपका उत्पादनमा पर्ने असरबारे विशेष छलफल भएको थियो ।

व्यापार र युद्धबारे भएन कुनै सहमति

फ्रान्सेली समकक्षी इम्मानुयल म्याक्रोँले सीलाइ युरोपसँगको व्यापारिक असन्तुलन कम गर्ने विषयमा छलफल गरेका थिए । युरोप र चीनबीचको व्यापार घाटा २९२ अर्ब युरोको रहेको छ । यस विषयलाई प्राथमिकतामा राखेर छलफल भए पनि कुनै सहमति भने बन्न सकेन ।

यस्तै, रूस युक्रेन युद्धपछि युरोपलाइ परेको असर र पुटिनसँग सीको सम्बन्धको आयाम प्रयोग गर्दै युद्धविरामको पहलबारे छलफल भए पनि यसमा कुनै सहमति भएन । फ्रान्स र चीन दुवैले ग्रीष्मकालीन ओलम्पिकलाइ मध्यनजर गर्दै युद्धविराम गर्नुपर्ने भन्दै संयुक्त विज्ञप्ति भने निकालेका थिए ।

सीले यसै महिनाभित्र पुटिनसँग आफुले संवाद गर्ने जानकारी भने गराएको अल जजिरामा समाचार छ । सीले पुटिनलाई बेइजिङमा स्वागत गर्न लागेका छन् ।

सर्बिया र हंगेरीमा विस्तारित आर्थिक छाप

फ्रान्सको तुलनामा सर्बिया र हंगेरीमा सीको भ्रमण आर्थिक र राजनीतिक कोणमा अझ बढी महत्वको भयो । पुर्वी र मध्य युरोपमा चिनिँया लगानी विस्तारका दृष्टिकोणले यो भ्रमण महत्वपूर्ण रहेको हो ।

सर्बियाले सीले अघि सारेको साझा भविष्य सहितको विश्व समुदाय संकल्पमा साझेदारीको सहमति गर्‍यो । दुई मुलुकबीच भएको स्वतन्त्र व्यापार सम्झौता १ जुलाइ देखि कार्यान्वयनमा आउने भएको छ । नयाँ हवाइ अड्डा देखि चीनले रेल्वेमा सहयोग गर्ने सम्मको सहमति भएको छ ।

यता हंगेरीमा चीनले यातायात र उर्जामा लगानी गर्ने भएको छ । हंगेरी र सर्बियाका राजधानीलाइ जोड्नका लागि २.१ अर्ब डलर सहयोग गर्ने प्रतिवद्धता चीनले गरेको छ ।