पोखरा विश्वविद्यालयले सुरु गर्‍यो १०० बेडको शिक्षण अस्पताल

७ जेठ, पोखरा । पोखरा विश्वविद्यालयले आफ्नो मातहतमा १०० बेडको शिक्षण अस्पताल सञ्चालनमा ल्याएको छ ।

२२ भदौ २०८० मा आंशिक रुपमा सञ्चालन गरे पनि भवन निर्माण सकिएपछि सोमबारदेखि पूर्ण रुपमा अस्पताल सञ्चालन गरेको हो । सो अस्पतालको सोमबार गण्डकी प्रदेशका मुख्यमन्त्री खगराज अधिकारीले उद्घाटन गरे ।

पोखरा महानगरपालिका–३० खुदीमा विश्वविद्यालयको केन्द्रीय कार्यालयसँगै रहेको शिक्षण अस्पतालमा गत साल भदौदेखि बहिरंग सेवा सुरु गरेको थियो ।

बालरोग, स्त्री तथा प्रसुति, हाडजोर्नी तथा नशा, दन्त चिकित्सा लगायतका सेवा अस्पतालबाट सुरु भइसकेको छ । अस्पतालमा डेन्टल कार्यक्रम चलाउन पूर्वाधार तयार भइसकेको विश्वविद्यालयले जनाएको छ ।

चिकित्सा शिक्षाका कार्यक्रमहरुलाई प्रयोगात्मक अभ्यास गर्न अस्पताल आवश्यक पर्ने भएकाले विश्वविद्यालयले शिक्षण अस्पताल सञ्चालनमा ल्याएको हो । अस्पताललाई स्वास्थ्य बीमा कार्यक्रमसँग जोड्ने र विशिष्टीकृत सेवा प्रदान गर्ने विश्वविद्यालयको भनाइ छ ।

अस्पतालले २४ सै घण्टा आकस्मिक सेवा दिइरहेको छ भने औषधी, रेडियोलोजी र इसिजी सेवा पनि सञ्चालन भइरहेको अस्पताल प्रशासनले जनाएको छ । स्वास्थ्य विज्ञानतर्फ चिकित्सा शिक्षा आयोगले दिएको कोटामा विश्वविद्यालयले पब्लिक हेल्थ, फार्मेसी, बीपीटी, बीएस्सी नर्सिङ, बीएनएस कार्यक्रममा पठनपाठन सञ्चालनमा आएको छ ।

अस्पतालले आगामी दिनमा शल्यक्रिया सेवा, सघन उपचार कक्ष (आईसीयू), नवजात शिशु सघन उपचार कक्ष (एनआईसीयू) र अन्तरंग सेवा सञ्चालनको तयारी गरेको विश्वविद्यालयका निर्देशक डा. दीपेन्द्रकुमार यादवले जानकारी दिए ।

अस्पतालमा ४० कर्मचारीमध्ये ६ जना कन्सल्टेन्ट डाक्टर, ६ जना मेडिकल अफिसर, डेन्टल अफिसर र प्रयोगशालातर्फका जनशक्ति रहेका पोखरा विश्वविद्यालय स्वास्थ्य विज्ञान संकायका डिन सह–प्रा.डा. अमर नागिलाले जानकारी दिए ।

एमबीबीएस अध्यापन सुरु गर्न कम्तीमा ३०० बेडको अस्पताल चाहिने र आगामी दिनमा त्यो लक्ष्य पूरा गर्ने नागिलाले बताए ।

१०० बेडसम्मको शिक्षण अस्पतालको अनुमति गण्डकी प्रदेश सरकारले दिएको मुख्यमन्त्री खगराज अधिकारीले बताए । मेडिकल शिक्षासँगै गुणस्तरीय सेवा प्रदान गरेर नागरिकको विश्वास जित्न अधिकारीले अस्पताललाई आग्रह गरे ।

विश्वविद्यालयका विद्यार्थीले अन्य अस्पतालमा गएर प्रयोगात्मक अभ्यास गर्नुपर्ने परिस्थितिको अन्त्य गर्दै यस क्षेत्रका नागरिकको स्वास्थ्य सेवामा सुलभ र सहजता प्रदान गर्ने उपकुलपति प्रा.डा. प्रेमनारायण अर्यालले बताए ।

अन्य विश्वविद्यालयले खर्चको ८० प्रतिशत अनुदान पाए पनि पोखराले १० प्रतिशत मात्रै अनुदान पाएको उनको गुनासो छ ।

अस्पताल चलाउन पहिलेकै एउटा भवनसँगै ७ करोड रुपैयाँ लगानीमा नयाँ भवन बनाइएको छ । उपकरणसहित करिब १५ करोड रुपैयाँ लगानीमा अस्पताल सञ्चालनको अवस्थामा आइपुगेको हो । अस्पतालका लागि भारतीय दूताबासले एउटा एम्बुलेन्स प्रदान गरेको छ भने विभिन्न संघसंस्थाले उपकरण दिएका थिए ।

पोखरा विश्वविद्यालयको स्वास्थ्य विज्ञान संकाय अन्तर्गत स्कुल अफ हेल्थ एण्ड एलाइट साइन्स र शिक्षण अस्पताल रहेको छ । स्कुल अफ हेल्थ एण्ड एलाइट साइन्स अन्तर्गत स्नातक तहमा नर्सिङका दुई कार्यक्रम (बीएनएफ र बिएस्सी नर्सिङ), बीफार्मेसी, बीपीएच र बीपीटी गरी ६ वटा कार्यक्रम सञ्चालनमा छ ।

स्नातकोत्तर तहमा ६ वटा कार्यक्रम सञ्चालनमा छन् । यसै शैक्षिक सत्रदेखि हेल्थ साइन्समा विद्यावारिधी (पीएचडी) कार्यक्रम पनि सञ्चालनमा ल्याएको छ ।