हतारोमा भोलिदेखि खुल्दैछ धरहरा

२ असोज, काठमाडौं । ‘फिनिसिङ’ को काम नसकिंदै बिहीबारदेखि सर्वसाधारणका लागि धरहरा खुला हुँदैछ । सरकारले धरहरा चर्चाका लागि हतार गरेर खोल्न लागेको देखिन्छ ।

धरहराको कतिपय काम नै बाँकी हुँदाहुँदै प्रधानमन्त्री केपी शर्मा ओलीको दबाबमा खुल्न लागेको शहरी विकास मन्त्रालयकै अधिकारीहरू बताउँछन् ।

‘धरहराको केही काम बाँकी भएको सत्य हो, तर निर्माण भएर लामो समयसम्म पनि जनताले अनुभव गर्न नपाएको भन्दै प्रधानमन्त्रीको १०० दिनभित्र जसरी पनि चलाउने निर्देशन थियो । त्यही भएर संविधान दिवसको उपलक्ष्यमा खोल्न लागिएको हो,’ शहरी विकास मन्त्रालयका एक अधिकारीले भने ।

बुधबार उपप्रधानमन्त्री तथा शहरी विकासमन्त्री प्रकाशमान सिंह धरहरा खोल्ने पूर्वसन्ध्यामा निरीक्षण पुग्दा पनि त्यस्तै अवस्था थियो । धरहराको लिफ्ट चढ्नै लाग्दा लाइन गएर रोकिएको थियो । दुइटा लिफ्टमध्ये एउटा अझै सञ्चालनमा आइसकेको छैन ।

यस्तै बेसमेन्टमा रहेको पार्किङ पनि पूर्णरूपमा सञ्चालनमा आइनसकेको देखिन्छ । ‘अहिलेलाई एक तला मात्रै पार्किङ सञ्चालनमा छ । महानगरले त्यो गरिरहेको हो, पूरै पार्किङ क्षेत्रमा बत्ती, वायरिङ लगायत काम बाँकी नै छ,’ केन्द्रीय आयोजना कार्यान्वयन इकाइ (भवन तथा आवास) का एक अधिकारी भन्छन् । बेसमेन्टतर्फ रहेको शौचालय समेत पूर्णरूपमा सञ्चालनमा आइसकेको छैन ।

यो पनि पढ्नुहोस

अब चढ्न पाइनेछ धरहरा (तस्वीरहरू)

स्थलगत धरहरा हेर्दा बिहीबार साँझसम्म पनि फिनिसिङको काम भइरहेको देखिन्छ । धरहराको विभिन्न स्तम्भ मात्रै तयार भए पनि पार्कका संरचना अहिले पनि निर्माणाधीन नै छ ।

उक्त कुरा सहरी विकासमन्त्री प्रकाशमान सिंह पनि स्वीकार्छन् । सिंहले धरहरा आंशिक मात्र सञ्चालन गर्न लागिएको बताए । ‘अहिले चाहिँ अन्तरिमकालका लागिमात्र हो, पब्लिकमा धरहरा बनेको यत्तिका समय भइसक्यो, चढ्न त पाऔं भन्ने त इच्छा छ नि त,’ सिंहले भने । उनले पूर्ण सञ्चालन आएपछि मात्रै शुल्क लिने व्यवस्था गर्ने बताए ।

कसरी सञ्चालन हुन्छ धरहरा ?

केन्द्रीय आयोजना कार्यान्वयन इकाइका अनुसार क्यूआर र वेबसाइट सार्वजनिक गरेर अनलाइन बुकिङ मार्फत धरधहरा सर्वसाधारणले चढ्न पाउँछन् ।

‘दैनिक ५०० जनालाई चढ्न दिन्छौं, ४०० जना अनलाइन बुकिङ मार्फत टाइम लिएर निःशुल्क चढ्छन भने बुढाबुढी र फरक क्षमता भएका सुरुका १०० जनालाई धरहरा परिसरमै पासको व्यवस्था हुन्छ,’ परियोजना प्रमुख कोषनाथ अधिकारीले भने, ‘टिकट बुकिङका आधारमा प्रत्येक आधा घण्टादेखि एक घण्टाको ग्याप बनाएर १ सय जनालाई प्रवेश दिन्छौं, त्यसको अर्थ एउटा टोली ओर्लने बेला अर्को टोली उक्लियोस् भन्ने हो ।’

काठमाडौं सुन्धारास्थित नवनिर्मित धरहरा ३ असोजदेखि अन्तरिम रूपमा सञ्चालन गर्ने निर्णय २७ भदौको मन्त्रिपरिषद् बैठकले गरेको थियो । लगत्तै संविधान दिवस अवसर पारेर धरहरा चढ्न पाउने व्यवस्था गर्न सरकारले सहरी विकास मन्त्रालय मार्फत केन्द्रीय आयोजना कार्यान्वयन इकाइ (भवन तथा आवास) परियोजनालाई निर्देशन दिएको थियो ।

२०७२ को भूकम्पले भत्किनुअघि संघीय सरकारले काठमाडौं महानगरपालिकालाई धरहरा सञ्चालन तथा व्यवस्थापन जिम्मा दिएको थियो । महानगरले एक निजी कम्पनीलाई ठेक्कामा दिएको थियो ।

नयाँ धरहरा बनेपछि काठमाडौं महानगरले संघीय सरकारसँग धरहरा चलाउन ठेकेदारलाई जिम्मा दिनु सट्टा फेरि आफैंलाई जिम्मा दिन माग गरेको थियो । तर, संघीय सरकार अब महानगरलाई धरहरा चलाउन र व्यवस्थापन गर्न दिने पक्षमा देखिएको छैन । २७ भदौको मन्त्रिपरिषद् बैठकले धरहरा सञ्चालन सम्बन्धी यसअघिका सबै निर्णय खारेज गरिसकेको छ ।

बाहिरबाट हेर्दा पुरानै स्वरूपको ११ तला जस्तो देखिने धरहरामा अहिले भित्री संरचना २२ तलाको छ । भूकम्पले भत्किएको पुरानो धरहरा संरचना भग्नावशेष भने खुला रूपमा अवलोकन गर्न सकिने गरी सुरक्षित राखिएको छ ।

धरहरामुनि तीनतले भूमिगत पार्किङ बनेको छ । यहाँ प्रशासनिक भवन र संग्रहालय तथा बगैंचा समेत बन्दैछ । अहिलेसम्म धरहरा निर्माणको ९५ प्रतिशत मात्रै काम सकिएको छ । तत्कालीन प्रधानमन्त्री केपी शर्मा ओलीले ११ वैशाख २०७८ मा आधा काम पनि नसकिंदै धरहराको उद्घाटन गरेका थिए ।

त्यसपछि पनि निर्माण चलिरहेकाले धरहरा चढ्न खुला गरिएको थिएन । फेरि, प्रधानमन्त्री भएपछि ओलीले काम नसकिए पनि धरहरा चढ्न पाउने प्रबन्ध मिलाउने गरी मन्त्रिपरिषद्‍बाट निर्णय गरेका हुन् ।

तस्वीरहरू : चन्द्र आले/अनलाइनखबर