पूर्वप्रेमिकाले एक खर्ब रुपैयाँको बिटक्वाइन फोहोरमा फ्याँकिदिएपछि…

संयुक्त अधिराज्य बेलायतको वेल्समा बस्ने एक युवककी भूपू प्रेमिकाले एउटा यस्तो गल्ती गरेकी छिन् कि त्यो सायद उनको जीवनको सबैभन्दा ठूलो गल्ती तथा पछुतोको विषय बनेको छ ।

समाचार अनुसार वेल्सका जेम्स हावेल्सले आफ्नो हार्ड ड्राइभमा ८ हजार बिटक्वाइन राखेका थिए । सो बहुमूल्य हार्ड ड्राइभ उनकी पूर्वप्रेमिका हेल्फिनाले भुलवस फोहोरमा फ्याँकिदिइन् । उक्त बिटक्वाइनको मूल्य आजको भाउमा करिब १ खर्ब रुपैयाँ हुन्छ ।

जेम्सकी पूर्वगर्लफ्रेण्ड हेल्फिना एडी इभान्सका अनुसार उक्त दुर्घटना घरको सरसफाइँ गर्ने क्रममा भएको हो । उनी भन्छिन्- जेम्सले मलाई फोहोरको एउटा झोला फ्याँक्नका लागि भनेका थिए । मलाई त्यो झोलामा के थियो भन्ने थाहा थिएन । त्यसैले जेम्सले उक्त क्षतिका लागि मलाई जिम्मेवार ठहराउन सक्दैनन् ।

फोहोरको झोला खोज्दै जेम्स

त्यो करोडौं डलरको बिटक्वाइन भएको हार्ड ड्राइभको खोजीमा जेम्स अहिले यत्रतत्र पुगिरहेका छन् । जुन झोलामा उनको हार्ड ड्राइभ थियो त्यो झोला न्यूपोर्ट सहरको डम्पिंग साइटमा पुगिसक्यो र एक लाख टन फोहोरको थुप्रोमा कही हराएको छ । त्यसैले त्यो हार्ड ड्राइभ खोज्ने कुरा असम्भव जस्तै बनेको छ, तथापि जेम्सको आशा मरेको छैन ।

कानूनी लडाइँमा उत्रिंदै

जेम्सले न्यूपोर्ट नगर परिषदमाथि ४९ करोड ५० लाख पाउण्ड क्षतिपूर्ति माग गर्दै मुद्दा दायर गरेका छन् । प्रशासनले आफूलाई आफ्नो हार्ड ड्राइभ खोज्नका लागि फोहोरको थुप्रोसम्म जान नदिएको उनको आरोप छ । उनी भन्छन्- यो खजानाको मूल्य हरेक दिन बढिरहेको छ । मैले यो भेटाउनै पर्दछ ।

यदि आफ्नो उक्त हार्ड ड्राइभ फेला परेमा सो बिटक्वाइटको १० प्रतिशत हिस्सा न्यूपोर्ट सहरको विकासका लागि खर्चिने पनि उनले घोषणा गरेका छन् ।

उता न्यूपोर्ट नगर परिषदले भने फोहोरको थुप्रो खोतल्ने अनुमति दिन अस्वीकार गरेको छ । पर्यावरणीय कारणले गर्दा फोहोरको उत्खनन् असम्भव रहेको परिषद्को भनाइ छ ।

जेम्सले नगर परिषद्‍विरुद्ध हालेको मुद्दाको सुनुवाई यही महिना हुनेछ । त्यसैले जेम्सलाई उनको १ खर्ब रुपैयाँ बराबरको बिटक्वाइन प्राप्त हुनेछ वा त्यो सधैंका लागि फोहोरमै दबिएर रहनेछ भन्ने कुरा भविष्यको गर्भमा रहेको छ ।