अदालतसमक्ष रवीन्द्र मिश्रः ‘बाहिर राखेर छानबिन गर्दा के बिग्रन्छ ?’

News Summary

Generated by OK AI. Editorially reviewed.

राष्ट्रिय प्रजातन्त्र पार्टीका वरिष्ठ उपाध्यक्ष रवीन्द्र मिश्रले आफूलाई हिरासतबाहिरै राखेर छानबिन गर्न माग गरेका छन्।
उनले म्याद थपको प्रक्रियामा आफूमाथि लगातार अन्याय भएको उनको भनाइ छ ।
मिश्रले सरकारले राजनीतिक प्रतिशोध साँधेकाे भन्दै न्यायालयबाट पनि न्याय नपाए कहाँ जाने भन्दै प्रश्न गरेका छन् ।

३० वैशाख, काठमाडौं । राष्ट्रिय प्रजातन्त्र पार्टी (राप्रपा)का वरिष्ठ उपाध्यक्ष रवीन्द्र मिश्रले आफूलाई हिरासतबाहिरै राखेर छानबिन गर्दा के बिग्रन्छ भन्दै न्यायालयमा प्रश्न उठाएका छन् ।

मंगलबार म्याद थपका लागि जिल्ला अदालत काठमाडौं लगिएका मिश्रले बयानका क्रममा म्याद थप्नका लागि उपस्थित गराउने कार्य दुख दिने गरी भइरहेको गुनासो राखे ।

‘श्रीमान् एकदमै अन्याय भयो । न्यायलय प्रति पूर्वन्यायाधीशहरूले प्रश्न उठाइरहनुभएको छ,’ मिश्रले अदालतमा भने, ‘आज छुट्नु पर्‍यो भन्ने मेरो माग हो श्रीमान् ।’

मिश्रले भागेर कहिं नजाने प्रतिबद्धता जनाउँदै बाहिर बसेर छानबिनमा सघाउने बताए । ‘न बाहिर जान्छु । न प्रमाण नष्ट गर्छु । राजनीतिक प्रतिशोध साँधिएकोमा न्यायालयबाट पनि न्याय नपाए कहाँ जाने ?’ मिश्रले न्यायाधीशसँग भने ।

हिरासतको बसाइबाट प्राप्त गरेको अनुभव सुनाउने क्रममा उनले राज्यको अधिकार हुने तर नागरिकको नहुने अवस्था रहेको बताए । राप्रपाका महामन्त्री डा. धवलशमशेर राणालाई हाजिर जमानीमा छोड्दा समेत आफूलाई हिरासतमा राखिएको प्रति उनले असन्तुष्ट व्यक्त गरे ।

राज्यका सबै अंग बिग्रे पनि न्यायालय प्रति विश्वास कायम रहेको सुनाउँदै मिश्रले १५ चैतमा तीनकुनेमा भएको प्रदर्शनमा हिंसात्मक अभिव्यक्ति एक शब्द पनि नदिएको दाबी गरे ।