‘संघीय संरचना घटाऔं, प्रतिनिधि सभामा प्रत्यक्ष र राष्ट्रिय सभामा समानुपातिक सांसद मात्र बसौं’

News Summary

Generated by OK AI. Editorially reviewed.

नेपाली कांग्रेसका नेता जितजंग बस्नेतले स्थानीय तहदेखि केन्द्रसम्मको संरचना पुनर्संरचना आवश्यक भएको बताएका छन्।
उनले वडाको सदस्य, मन्त्री र सांसदहरूको संख्या घटाउने प्रस्ताव राखेका छन्।
साथै, उनले सांसदहरूको भत्ता पनि घटाउनुपर्ने धारणा व्यक्त गरेका छन्।

३१ जेठ, काठमाडौं । नेपाली कांग्रेसका नेता जितजंग बस्नेतले स्थानीय तहदेखि केन्द्रसम्म पुनर्संरचना आवश्यक रहेको बताएका छन् ।

वडा तहमा तीन सदस्य, प्रदेशमा पाँच मन्त्री र केन्द्रमा प्रतिनिधि सभामा प्रत्यक्ष निर्वाचित सांसदमात्र रहने गरी पुनर्संरचना गर्नुपर्ने उनको प्रस्ताव छ ।

आज राष्ट्रिय सभाको बैठकमा बोल्दै बस्नेतले भने, ‘सबै तहका संरचनाहरु, स्थानीय निकायदेखि संघीय संरचना पनि घटाउनुपर्छ । हाम्रो वडा तहमा पनि पाँच जना वडा सदस्य काम छैन, तीन जना भए पुग्छ । दलित, महिला र एक जना, तीन जना भए पुग्छ ।’

उनले थपे, ‘प्रदेशमा पनि संरचना घटाउनुपर्‍यो, पाँच जना मन्त्री भए पुग्छ । संघीय संसदमा पनि । डाइरेक्ट जो पार्लियामेन्ट मेम्बर छन्, प्रतिनिधि सभामा बस्छन् । जो समानुपातिक वाला छ, राष्ट्रिय सभामा बस्नुपर्‍यो । त्यसको पनि संरचना घटाउनुपर्‍यो ।’

उनले सांसदहरुको भत्ता समेत घटाउनुपर्ने धारणा राखे । बस्नेतले भने, ‘सांसदहरुको पनि तलदेखि माथिसम्म भत्ता घटाउनुपर्‍यो, नभए भत्ता पनि खारेज गर्नुपर्‍यो ।’

नेपाली कांग्रेसले समावेशी लोकतान्त्रिक गणतन्त्रात्मक संविधानमा विश्वास गर्ने बताउँदै उनले त्यसको संरचना भने घटाउनुपर्ने बताए । उनले भने, ‘हाम्रो विश्वास भनेको यो मल्टिपार्टी डेमोक्रेसी हो । यसमा संरचना कति घटाउन सकिन्छ, घटाएर अगाडि बढौं भन्ने मलाई लाग्छ ।’

उनले बजेटका प्रमुख प्राथमिकता र सिद्धान्तलाई २६ भागमा विभाजन गरी प्रस्तुत गरेका थिए ।