लेखा समितिमा सांसद मोदीको प्रश्न- हामी दास हो र ?

News Summary

Generated by OK AI. Editorially reviewed.

नेकपा माओवादी केन्द्रका सांसद अमनलाल मोदीले संसद् समितिमा प्रतिपक्षलाई बोल्न रोकिएको भन्दै आपत्ति जनाए।
उनले समितिको सभापतिलाई सार्वजनिक विषयमा बोल्न नदिएको आरोप लगाए।
मोदीले संसद् सार्वभौम र माओवादी प्रतिपक्षको अधिकार भएको बताए।

८ जेठ, काठमाडौं । नेकपा (माओवादी केन्द्र) का सांसद अमनलाल मोदीले संसदीय समितिमा प्रतिपक्षलाई बोल्न रोकिएको भन्दै आपत्ति जनाएका छन् ।

बिहीबारको सार्वजनिक लेखा समितिमा बोल्दै उनले समिति सभापतिसँग आपत्ति जनाएका हुन् । संसद् सार्वभौम हुने र सार्वजनिक विषयमा कुरा राख्न पाइने उनले बताए ।

‘संसद् भनेको सार्वभौम हो । यो मिनि पाल्र्यामेन्ट हो । सार्वजनिक विषयका कुरा, हामीलाई लागेको विषय, त्यसमध्ये पनि हामी माओवादी प्रतिपक्षमा छौँ,’ उनले भने, ‘हामीले बोलेका विषयमा तपाईंले रोक्नुहुन्छ । यो दुर्भाग्य हो । हामीलाई प्रतिबन्ध लगाउन पाउनु हुन्न ।’

सार्वजनिक लेखा समितिको सभापति प्रतिपक्षको हुनुपर्ने उनले दोहोर्‍याए ।

‘सार्वजनिक लेखा समिति प्रतिपक्षको हुनुपर्छ भनेर बोल्दा तपाईंहरू हुनु हुँदैन, हुँदैन भन्ने । तपाईंहरूको हामी दास हो र ? माओवादी पार्टीको कुरा हो नि यो,’ उनले भने ।

सोही विषयमा केहीबेर समिति सभापतिसँग उनको भनाभन समेत भएको थियो ।