बैंकहरूको अनिवार्य नगद मौज्दात आइतबारदेखि दैनिक ९० प्रतिशत

News Summary

Generated by OK AI. Editorially reviewed.

केन्द्रीय बैंकले बैंक तथा वित्तीय संस्थाले अनिवार्य नगद मौज्दात ९० प्रतिशत कायम गर्न निर्देशन दिएको हो।
मौज्दातको गणना साप्ताहिक औसत निक्षेप र दैनिक मौज्दातको आधारमा गरिनेछ।
सेयर धितो कर्जाको जोखिम भार १२५ प्रतिशतबाट घटाएर १०० प्रतिशत गरिएको छ।

१४ जेठ, काठमाडौं । बैंक तथा वित्तीय संस्थाले आगामी आइतबारदेखि दैनिक रुपमा राख्ने अनिवार्य नगद मौज्दात बढेको छ ।

केन्द्रीय बैंकले मौद्रिक नीतिको तेस्रो त्रैमासिक समीक्षामा वित्तीय प्रणालीको तरलता व्यवस्थापनका लागि अनिवार्य नगद मौज्दात दैनिक सीमा बढाउने उल्लेख गरेको थियो । सो अनुसार केन्द्रीय बैंकले निर्देशन जारी गर्दै दैनिक कायम गर्नुपर्ने अनिवार्य नगद मौज्दात ९० प्रतिशत पुर्‍याउन भनेको हो ।

बैंक तथा वित्तीय संस्थाले कुल निक्षेप दायित्वको ४ प्रतिशत अनिवार्य नगद मौज्दात बापत केन्द्रीय बैंकमा राख्नु पर्छ । यस व्यवस्था बमोजिम कायम गर्नु पर्ने अनिवार्य नगद मौज्दातको न्यूनतम ९० प्रतिशत रकम आइतबारदेखि दैनिक रुपमा राख्नु पर्नेछ ।

अनिवार्य मौज्दातको गणना साप्ताहिक औसत निक्षेप मौज्दातका आधारमा गरिने केन्द्रीय बैंकले जनाएको छ । मौज्दातको गणना गर्दा एक हप्ता अन्तराल कायम गरी त्यसपछिको दुई हप्तामा कायम गरिने औसत नगद मौज्दातलाई लिइन्छ ।

अनिवार्य मौज्दात गणना गर्ने प्रयोजनको लागि कुल निक्षेप दायित्वका हकमा साप्ताहिक रुपमा आइतबारदेखि शनिबारसम्मको कुल निक्षेपको योगलाई सात अङ्कले भाग गरी दैनिक औसत निर्धारण गर्नुपर्नेछ ।

यसैगरी, केन्द्रीय बैंकको मौज्दातको गणना गर्दा आइतबारदेखि १४ औं दिनको शनिबारसम्मको दैनिक मौज्दातको कुल योगलाई चौध अङ्कले भाग गरी दैनिक औसत निर्धारण गरिनेछ । नयाँ व्यवस्था अनुसार कायम गर्नुपर्ने अनिवार्य मौज्दातको कम्तीमा ९० प्रतिशत मौज्दात दैनिक रुपमा कायम हुनुपर्छ ।

साथै केन्द्रीय बैंकले सेयर धितो कर्जाको जोखिम भार पनि घटाएको छ । केन्द्रीय बैंकले सेयर धितो कर्जाको जोखिम भार १२५ प्रतिशतलाई सय प्रतिशतमा झारेको छ ।