महिला उद्यमीलाई सघाउने ‘एकेडेमी फर वुमन इन्टरप्रेन्योर्स’ कार्यक्रम शुभारम्भ

News Summary

Generated by OK AI. Editorially reviewed.

अमेरिकी राजदूत डीनआर थम्पसनले नेपाली महिला उद्यमीलाई लक्षित ‘एडब्लुई’ कार्यक्रमको शुभारम्भ गरे।
कार्यक्रमले ३० महिला उद्यमीलाई विश्वस्तरीय तालिम, परामर्श र स्रोत प्रदान गर्नेछ।
यसले नेपाली र अमेरिकी व्यवसायलाई मद्दत गरी दुवै देशको अर्थतन्त्र बलियो बनाउने अपेक्षा गरिएको छ।

काठमाडौं । नेपालका लागि अमेरिकी राजदूत डीनआर थम्पसनले नेपाली महिला उद्यमीलाई लक्षित ‘एकेडेमी फर वुमन इन्टरप्रेन्योर्स (एडब्लुई) कार्यक्रमको शुभारम्भ गरेका छन् ।

महिलालाई आफ्नो व्यवसाय वृद्धि गर्न र स्थानीय आर्थिक वृद्धिलाई सशक्तरुपमा अघि बढाउन अमेरिकी सरकारले यो कार्यक्रम संचालन गरेको जनाइएको छ । यो पहलमार्फत अमेरिका र नेपालबीचको व्यवसायिक सम्बन्धलाई बलियो बनाउने आशा अमेरिकी दूतावासले लिएको छ ।

विहिबार आयोजित शुभारम्भ कार्यक्रमलाई सम्बोधन गर्दै राजदूत थम्पसनले यो पहल कार्यक्रम मात्र नभएर एक ‘मूभमेन्ट’ रहेको बताए । ‘महिलाहरू सशक्त हुँदा अर्थतन्त्र वृद्धि हुन्छ, समुदायहरू फस्टाउँछन् र दिगो साझेदारी अझै गहिराइमा पुग्छ भन्ने विश्वासलाई यसले मद्दत गर्छ’ राजदूत थम्पसनले भने ।

प्रसिद्ध नेपाली व्यवसायी, अमेरिकन चेम्बर अफ कमर्स इन नेपालका सदस्यको नेतृत्वमा आयोजित तीन दिने आवासीय बुटक्याम्पले ३० महिला उद्यमीलाई उनीहरूको उद्यमलाई बढाउन विश्वस्तरीय तालिम, परामर्श र स्रोत प्रदान गर्ने जनाइएको छ ।

विश्वव्यापी रूपमा चर्चित ‘नजाफी १०० मिलियन लर्नर्स’ कोर्सद्वारा सञ्चालित उक्त कार्यक्रमले सहभागीलाई उनीहरूको समुदायमा नवप्रवर्तन र रोजगारी सिर्जनालाई बढावा दिन र व्यावहारिक सीप सिक्न मद्दत गर्छ ।

कार्यक्रमले व्यापार, सहकार्य र वृद्धिका लागि नयाँ अवसरहरू सिर्जना गरेर अमेरिकी र नेपाली व्यवसायलाई मद्दत गर्ने अपेक्षा गरिएको छ । साथै, दुवै देशको अर्थतन्त्रलाई बलियो बनाउने जनाइएको छ ।

‘यसले विदेशमा अवसर खोज्नुको सट्टा नेपालीहरूलाई स्वदेशमै फस्टाउने उद्यमहरू निर्माण गर्न अर्थपूर्ण आर्थिक अवसरहरू सिर्जना गर्दछ’ कार्यक्रमबारे दूतावासले भनेको छ ।