यातायात व्यवसायीसँग वार्ता गर्ने सरकारी टोलीको नेतृत्वमा पन्थ

News Summary

Generated by OK AI. Editorially reviewed.

सरकारले यातायात व्यवसायीहरूसँग वार्ता गर्न समिति गठन गरेको छ, जसमा सात जना र व्यवसायीहरूबाट चार जना सदस्य रहने छन्।
सोमबार गृह मन्त्रालयमा भएको छलफलमा समिति गठन गर्न सहमति भएको हो, जसमा मन्त्री रमेश लेखक समेत उपस्थित थिए।
यातायात व्यवसायीहरूले आफ्नो आन्दोलन भने जारी राख्ने बताएका छन्।

१९ जेठ, काठमाडौं । सरकारले यातायात व्यवसायीहरूसँग वार्ता गर्न भौतिक पूर्वाधार तथा यातायात मन्त्रालयका सहसचिव कृष्ण पन्थको संयोजकत्वमा वार्ता समिति गठन गरेको छ ।

इन्जिनियर पन्थ पूर्वाधार निर्माण तथा यातायात महाशाखामा कार्यरत छन् ।

सोमबार गृह मन्त्रालयमा मन्त्री रमेश लेखक समेतको उपस्थितिमा विभिन्न मन्त्रालयका कर्मचारी र यातायात व्यवसायीका प्रतिनिधिहरूबीच भएको छलफलमा वार्ता समिति गठन गर्ने सहमति भएको थियो ।

सरकारको तर्फबाट ७ जना र यातायात व्यवसायीको तर्फबाट चार जना हुने गरी वार्ता समिति गठन गर्ने सहमति भएको नेपाल यातायात व्यवसायी राष्ट्रिय महासंघका अध्यक्ष विजयबहादुर स्वाँरले जानकारी दिए ।

वार्ता गर्न समिति गठन भए पनि यातायात व्यवसायीहरूले आफ्नो आन्दोलनलाई जारी राख्ने सार्वजनिक यातायात आन्दोलन परिचालन समितिका संयोजक सरोज सिटौलाले अनलाइनखबरलाई जानकारी दिए ।