४८ वर्षपछि फिल्ममा अरुणा लामाको ‘उडिजाऊँ भने म पन्छी हैन’

काठमाडौं । पछिल्लो समय पुरानो फिल्मका चर्चित गीतलाई नयाँ फिल्ममा ‘रि-क्रिएसन’ गर्ने ट्रेन्ड बढेको छ । ‘माइतीघर’को ‘वसन्त नै बस्न खोज्छ यहाँ’, ‘नरसिंहा अवतार’को ‘अच्छा लिकिन लण्डनको चिसोले’ यसका केही ताजा उदाहरण हुन् ।

४८ वर्षअघि रिलिज भएको फिल्म ‘परालको आगो’मा समावेश कालजयी गीत ‘उडिजाऊँ भने म पन्छी हैन, बस्न ए लै मन छैन’को पनि ‘रि-क्रिएसन’ हुने भएको छ । सोही नामको नयाँ फिल्ममा यो गीतको पुनःप्रयोग हुने जनाइएको छ ।

संगीतकार शान्ति ठटालसँग भारतको सिलिगुढीस्थित उनको घरमै पुगेर निर्माताले प्रतिलिपि अधिकार अनुमति लिएको प्रेषित विवरणमा उल्लेख छ । नेपाली फिल्मकी पहिलो महिला संगीतकार समेत रहेकी ठटालले नयाँ बन्ने फिल्ममा उक्त गीत राख्न अनुमति दिएको जनाइएको छ ।

‘परालको आगो’ ( सन् २०२५)लाई सुशिल पोखरेलले निर्माण गर्न लागेका हुन् । ठटालको संगीत रहेको उक्त कालजयी गीतमा मनबहादुर मुखियाको शब्द र अरुणा लामाको स्वर समावेश छ ।

फिल्मको विषयवस्तुलाई न्याय गर्न सो गीत नै चाहिने हुनाले स्रष्टा ठटालकै निवासमा पुगेर अनुमति लिएको जनाइएको छ । संगीतकार ठटालले पनि सोही नामको नयाँ फिल्ममा प्रयोगका लागि आफूले अनुमति दिएको बताएकी छन् ।

लिखित सन्देशमा उनले भनेकी छन्, ‘श्री ॐ सिने मेकर्स प्रालिबाट निर्माण हुन लागेको नेपाली कथानक चलचित्र गुरुप्रसाद मैनालीको कथा ‘परालको आगो’मा उल्लेखित शब्द र मैले कम्पोज गरेको संगीत ‘उडी जाऊँ भने म पन्छी हैन, बस्न ए लै मन छैन’ पुनःनिर्माणाधिन चलचित्र ‘परालको आगो’मा प्रयोग गर्न मेरो पूर्ण मन्जुरी छ ।’

उनले फिल्म सफलताको शुभकामना समेत दिएकी छन् । कथाकार गुरुप्रसाद मैनालीको कृतिमा आधारित रहेर बन्न लागेको नयाँ फिल्ममा जितु नेपाल, प्रकाश सपुत, सुहाना थापा अनुबन्धित छन् । लक्ष्मण सुनारले यो फिल्मलाई निर्देशन गर्दैछन् । फागुनदेखि फिल्म छायांकन हुने जनाइएको छ ।