अब प्रहरीमा संगीत रोयल्टीसम्बन्धी मुद्दा पनि दर्ता हुने

News Summary

Generated by OK AI. Editorially reviewed.

प्रहरीले संगीत रोयल्टी सम्बन्धी मुद्दा दर्ता गर्न थालेको छ, प्रतिलिपि अधिकार ऐन २०५९ अनुसार।
काठमाडौंमा प्रहरी अतिरिक्त महानिरीक्षक टेक बहादुर तामाङले प्रहरीहरूलाई निर्देशन दिए, जसले अधिकारको कार्यान्वयन सुनिश्चित गर्नेछ।
गीतकार संघ नेपालका महासचिव शिव राईले यस कदमले स्रष्टाहरूलाई आफ्नो अधिकार प्रयोग गर्न सक्षम बनाउने बताए।

२७ जेठ, काठमाडौं । अब प्रहरीमा पुगेका संगीत रोयल्टी सम्बन्धीको मुद्दा पनि दर्ता हुने भएको छ । प्रतिलिपि अधिकार ऐन २०५९ मा टेकेर संगीत रोयल्टी सम्बन्धीको मुद्दा दर्ता हुने भएको हो ।

यसका लागि काठमाडौंमा हालै सम्पन्न अन्तरक्रिया कार्यक्रममा प्रहरी अतिरिक्त महानिरीक्षक टेक बहादुर तामाङले प्रहरीहरूलाई निर्देशन पनि दिएका छन् । यस कदमले कानूनले प्रदान गरेको प्रतिलिपि अधिकारसम्बन्धी व्यवस्थाको कार्यान्वयन हुने तथा स्रष्टाको सिर्जना जगेर्ना हुने उनले बताए ।

त्यस्तै गीतकार संघ नेपालका महासचिव शिव राईका अनुसार यस कदमले स्रष्टाहरूलाई कानूनले दिएको आफ्नो हकअधिकार प्रयोग गर्न सक्षम बनाउने छ । यदि कसैले अनुमति नलिई सार्वजनिक प्रयोग गरे, त्यसबापतको रोयल्टी नतिरे स्रष्टाले काठमाडौं उपत्यका भित्रमा उजुरी दिन सक्ने छन् ।

यो पनि पढ्नुहोस

रेडियोमा संगीत रोयल्टी विवाद : भएको के हो ?

यसका लागि प्रहरीले उपत्यका भित्रका २१ प्रहरी एकाईहरूमा कपिराइट पुलिस सेल नै गठन गरिसकिएको उनले सुनाए ।

हाललाई यस्तो सेल उपत्यकाभित्रमा मात्र सीमित गरिए पनि भविष्यमा देशैभर राख्ने तामाङले जानकारी दिए । यसअघि भने नेपालमा यस्तो व्यवस्था गरिएको थिएन । पछिल्लो समयमा नेपाल रोयल्टी सङ्कलन समाजले गीत/संगीत को प्रयोग गरेबापतको रोयल्टी उठाउने काम गरिरहेको छ ।