६ घण्टादेखि आदेश कुरेको कुर्‍यै प्रसाईंसहित तीनकुने घटनाका प्रतिवादी

आदेश लेखिरहेका छन् न्यायाधीश ध्रुवराज कार्की

अनलाइनखबर

२०८२ जेठ २९ गते २३:०५

News Summary

Generated by OK AI. Editorially reviewed.

काठमाडौंको तीनकुनेमा भएको राजावादी आन्दोलनका प्रतिवादीहरूको थुनछेक बहस बिहीबार सकियो।
अदालतले आदेश लेखिरहेको भए पनि रातिसम्म आदेश आएको छैन।
प्रतिवादीहरूलाई अदालत परिसरमै राखिएको छ र अनुसन्धानपछि मुद्दा दायर गरिएको हो।

२९ जेठ, काठमाडौं । गत चैत १५ गते काठमाडौंको तीनकुनेमा भएको राजावादी आन्दोलनका प्रतिवादीहरूको थुनछेक बहस बिहीबार साँझ ५ बजे नै सकिएको थियो ।

बहस सकिए पनि राति ११ बजेसम्म पनि आदेश आएको छैन । अदालतका कर्मचारीहरूका अनुसार, न्यायाधीश ध्रुवराज कार्की आदेश लेखिरहेका छन् ।

६ घण्टादेखि आदेश लेखन कार्यमा रहँदा अहिलेसम्म आदेश आउन नसकेको हो ।

जिल्ला प्रहरी परिसर, काठमाडौंका एसपी अपील राज बोहराका अनुसार, प्रतिवादीहरू सबैलाई अदालतमै राखिएको छ ।

मेडिकल व्यवसायी दुर्गा प्रसाईंसहितका प्रतिवादीहरूलाई अहिले अदालत परिसरमै राखिएको छ ।

काठमाडौं जिल्ला अदालतमा प्रतिवादीहरूको बयान सकेर २० जेठदेखि थुनछेक बहस सुरु भएको थियो । आज उक्त बहस सकिएको हो ।

बहस सकिएसँगै जिल्ला अदालत वरपर ठूलो संख्यामा प्रहरी परिचालन गरिएको छ ।

तीनकुने घटनामा प्रतिवादीमध्ये अहिले ३९ जना प्रतिवादी हिरासतमा छन् । जिल्ला प्रहरी परिसर काठमाडौंले अनुसन्धान सकेर जिल्ला सरकारी वकिल कार्यालय काठमाडौंमा प्रतिवेदन बुझाएको थियो ।

त्यसपछि सरकारी वकिल कार्यालयले ६१ जनाविरुद्ध काठमाडौं जिल्ला अदालतमा मुद्दा दायर गरेको थियो । चार जना भने नाबालक रहेकाले भक्तपुर पठाइएको थियो ।

उनीहरू ११ जेठमा मुद्दा दायर भएको थियो । त्यसयता निरन्तर काठमाडौं जिल्ला अदालतका न्यायाधीश ध्रुवराज कार्कीको इजलासमा थुनछेक बहस भइरहेको छ ।

११ जनालाई आपराधिक उपद्रवको मात्रै मुद्दा लगाइएको थियो । आपराधिक उपद्रवको मुद्दा खेपेकाहरू भने धरौटी बुझाएर रिहा भइसकेका छन् ।

राजावादी आन्दोलनका कमाण्डर दुर्गा प्रसाईंसहित आठ जनालाई भने कर्तव्य ज्यानको समेत मुद्दा लगाइएको छ ।