अमेरिकामाथि आक्रमण गरे इरानले कठोर प्रतिकार व्यहोर्नुपर्ने ट्रम्पको चेतावनी

News Summary

Generated by OK AI. Editorially reviewed.

अमेरिका राष्ट्रपति डोनाल्ड ट्रम्पले इरानलाई आक्रमण रोकेर वार्तामा आउन आग्रह गरे।
उनले भने, \'यदि हामीमाथि कुनै पनि प्रकारले इरानबाट आक्रमण भयो भने, अमेरिकी सशस्त्र सेनाको सम्पूर्ण शक्ति खनिन सक्छ।’
इजरायलले शनिबार इरानको रक्षा मन्त्रालय र ग्यास प्रशोधन केन्द्रमा आक्रमण गरी क्षति पुर्याएको छ।

१ असार, काठमाडौं । अमेरिकाका राष्ट्रपति डोनाल्ड ट्रम्पले इरानलाई आक्रमण रोकेर वार्तामा आउन आग्रह गरेका छन् । अन्यथा अमेरिकाले सम्पूर्ण सैन्य शक्ति प्रयोग गरेर इरानमाथि आक्रमण गर्ने उनको चेतावनी छ ।

मध्यपूर्वमा इरान र इजरायलबीच क्षेप्यास्त्रसहित भिषण संघर्ष सुरुभएपछि ट्रम्पको यस्तो भनाइ आएको हो ।

आफ्नै सामाजिक सञ्जाल ट्रूथमा पोस्ट गर्दै ट्रम्पले भनेका छन्, ‘‘यदि हामीमाथि कुनै पनि प्रकारले इरानबाट आक्रमण भयो भने, अमेरिकी सशस्त्र सेनाको सम्पूर्ण शक्ति र कठोर प्रतिकार तपाईंहरू माथि त्यसरी खनिन सक्छ, जुन इतिहासमै कहिल्यै देखिएको छैन ।’

इजरायलले शनिबार इरानको राजधानी तेहरानस्थित रक्षा मन्त्रालयको मुख्यालय र बुसहर प्रान्तको साउथ पार्स ग्यास प्रशोधन केन्द्रमा आक्रमण गरेर क्षति पुर्याएको छ । राष्ट्रपति ट्रम्पले इरानमाथिको इजरायली आक्रमणमा अमेरिकाको कुनै हात नरहेको दाबी गरेका हुन् ।

ट्रम्पले भनेका छन्, ‘म सजिलैसँग इरान र इजरायलबीच सम्झौता गराएर यो रक्तपातपूर्ण द्वन्द्व अन्त्य गर्न सक्छु ।’ आइतबार इरानले तेहरान र वाशिंगटन डीसीबीच चलिरहेको छैटौं चरणको आणविक वार्ता रद्द गरेको छ ।

इजरायली आक्रमणपछि अब अमेरिकासँगको वार्ताको ढोका बन्द भएको इरानको भनाइ छ ।

शनिबार इरानले इजरायललाई थप सहयोग नगर्न अमेरिका, यूके, फ्रान्सलाई चेतावनी दिएको थियो ।

अन्यथा, मध्यपूर्वका देशमा रहेका अमेरिकी सैन्य अड्डा र पूर्वाधारलाई निसाना बनाउने इरानले चेतावनी दिएको थियो ।