आमिरको ‘सितारे जमीन पर’ नेपालमा रिलिज भएन, कारण के हो ?

News Summary

Generated by OK AI. Editorially reviewed.

नेपाली वितरकले भारतीय निर्माताको महंगो वितरण शुल्क प्रस्तावपछि ‘सितारे जमीन पर’ फिल्मको प्रदर्शन स्थगित गरे।
शुक्रबारदेखि नेपालमा तीन विदेशी फिल्महरू प्रदर्शनमा आएका छन्, कुनै घरेलु फिल्म छैन।
‘कुबेरा’, ‘एलियो’, र ‘२८ इयर्स लेटर्स’ फिल्महरू प्रदर्शनमा आएका छन्।

काठमाडौं । शुक्रबारदेखि प्रदर्शन हुने अपेक्षा गरिएको आमिर खान स्टारर बलिउड फिल्म ‘सितारे जमीन पर’को प्रदर्शन नेपालमा यो समाचार लेख्दासम्म नहुने निश्चित भएको छ ।

भारतीय निर्माताले महंगो वितरण शुल्क प्रस्ताव गरेपछि नेपाली वितरक पछि हटेका हुन् । स्रोतका अनुसार भारतीय वितरकले १ करोड भारु रकम प्रस्ताव गरेका थिए ।

‘पैसामा कुरा नमिलेपछि नेपालमा ल्याएनौं’ आमिर खान प्रोडक्सनसँग कुराकानीमा संलग्न एक नेपाली वितरकले अनलाइनखबरसँग भने । शुक्रबारसम्म फिल्म रिलिज नभएपनि त्यसपछि रिलिज हुन्छ वा हुँदैन, यसबारे स्वतन्त्र पुष्टि भैसकेको छैन ।

शुक्रबारदेखि ३ फिल्म रिलिज

यस साता नेपालको हलमा ३ विदेशी फिल्म मात्र प्रदर्शनमा आएका छन् । कुनै पनि घरेलु फिल्म नआउँदा यसको फाइदा ‘महाभोज’सहित प्रदर्शनरत अन्य फिल्मलाई हुनसक्छ ।

दक्षिण भारतीय फिल्म ‘कुबेरा’ प्रदर्शनमा आएको छ । धनुष र नागार्जुना, रश्मिका मन्दाना स्टारर यो फिल्मको रनटाइम १८१ मिनेट छ ।

हलिउडको कमेडी, एड्भेन्चर फिल्म ‘एलियो’ पनि प्रदर्शनमा आएको छ । डिज्नीको यो एनिमेटेड फिल्ममा चर्चित हलिउड स्टारहरूले आवाज दिएका छन् ।

हलिउडको हरर थ्रीलर फिल्म ‘२८ इयर्स लेटर्स’ पनि शुक्रबारदेखि प्रदर्शनमा आएको छ । यो फिल्ममा ज्याक ओनेल, राल्फ फिएनेस, आरोन टेलर जोनसनको शीर्ष भूमिका छ ।