नयाँ मौद्रिक नीतिबारे गभर्नरलाई होटल संघको सुझाव

९ असार, काठमाडौं । होटल एसोसिएसन नेपाल (हान) को प्रतिनिधिमण्डलले सोमबार नेपाल राष्ट्र बैंकका गभर्नर प्रा. डा. विश्वनाथ पौडेलसँग नयाँ मौद्रिक नीतिबारे सुझाव बुझाएको छ ।

आगामी आर्थिक वर्ष २०८२/८३ को वार्षिक बजेटमा पर्यटन क्षेत्र र होटल उद्योगका लागि बजेटबाट घोषित कार्यक्रमको सफल तथा प्रभावकारी कार्यान्वयनका लागि राष्ट्र बैंकबाट जारी हुने मौद्रिक नीतिमा उपयुक्त नीति अवलम्बन गरी समग्र पर्यटन तथा होटल उद्योगको वृहत्तर विकास र विस्तारमा सहयोग पुग्ने सुझाव हानले दिएको छ ।

उक्त अवसरमा हान अध्यक्ष विनायक शाहले पूर्वाधारको उचित व्यवस्थापन हुन नसकेका कारण होटल व्यवसाय सञ्चालनमा प्रत्यक्ष तथा अप्रत्यक्ष खर्चमा भारी मात्रामा वृद्धि भएको र मागको अनुपातमा होटल कोठा अत्यधिक आपूर्ति रहेको बताए ।

क्षमताको एक तिहाइमात्र माग रहेको हुँदा नियमित किस्ता र नियमित ब्याज भुक्तान गर्न समेत कठिनाइ भएकाले व्यवसायको वित्तीय अवस्था अनुसार विशेष उद्योग सरह कर्जाको साँवा–ब्याज भुक्तानी गर्न पाउने व्यवस्थाका लागि आग्रह गरे ।

अध्यक्ष शाहले होटलको डलर खाता प्रयोग गर्न विभिन्न निकायको अनुमति तथा सिफारिस प्राप्त गर्नुपर्ने र उक्त प्रक्रियामा समय लाग्ने भएकाले होटललाई भुक्तानी गर्न सहज हुने गरी, होटलको स्तर हेरी अमेरिकी डलर टपअपको दायरा विस्तार गर्दै होटलका नाममा प्रिपेड डलर कार्ड अथवा डलर क्रेटिड कार्ड उपलब्ध गराइ दिँदा थप प्रभावकारी हुने बताए ।

पर्यटकले ५ हजार डलर साथमा ल्याउन पाउने व्यवस्था भएसँगै हालको प्रावधान अनुसार एक पटकमा ३ सय डलरमात्र सटही गर्न पाउने भन्ने नियम ठूला तारे होटलमा आउने खर्चालु पर्यटकका लागि अपर्याप्त भएकाले यसलाई बढाउन अध्यक्ष शाहले आग्रह गरे ।

अधिकांश होटलको देशविदेशबाट अनलाइन प्ल्याटफर्म मार्फत बुकिङ आउने गरेको भन्दै अनलाइन बुकिङ प्ल्याटफर्मबाट भारतीय तथा नेपाली नागरिकले बुकिङ गरे त्यसबापत रकम भुक्तानी आ–आफ्नो मुद्रामा गर्ने गरेको तर उक्त प्ल्याटफर्मलाई कमिसन डलरबाट गर्नुपर्ने बाध्यता रहेको समेत बताए ।

सुझावपत्रमा नेपाल सरकारले समेत होटल उद्योगलाई राष्ट्रिय प्राथमिकता प्राप्त उद्योग, विशेष उद्योग सरह छुट तथा उत्पादनमूलक उद्योग सरह छुट तथा सुविधा प्रदान गरी राष्ट्रिय महत्त्वको उद्योगको मान्यता दिएको हुँदा सोही अनुसार विशेष प्राथमिकतामा राखेर प्रदान गरिने कर्जामा बेस रेटमा एक प्रतिशतभन्दा नबढ्ने गरी ब्याज कायम गर्दै पर्यटन उद्योगको मेरुदण्डका रूपमा रहेको होटल उद्योगलाई प्रोत्साहन नीति अवलम्बन गरिनुपर्ने उल्लेख छ ।

अध्यक्ष शाहले विशेषगरी नेपाली कम्पनीले समेत विदेशमा शाखा विस्तार गरी होटल प्रवर्द्धन मार्फत समग्र पर्यटन उद्योगको प्रवर्द्धन तथा विकास हुनेमात्र नभई मुलुककै पर्यटन प्रवर्द्धन हुने भएकाले ती कम्पनीका लागि विदेशी मुद्रा कारोबारका लागि स्वीकृति दिनुपर्ने बताए ।

क्षेत्रीय पर्यटन प्रवर्द्धनमा सघाउ पुग्ने खालका नीति जस्तै सार्क सदस्य राष्ट्र बंगलादेश र श्रीलंकाबाट नेपाल भ्रमणमा अत्यधिक माग बढेको क्रममा त्यहाँबाट नेपाल आउने पर्यटकले बंगलादेशी टाका तथा श्रीलंकाली रुपैयाँमा समेत भुक्तानी गर्न सक्ने व्यवस्था भए ती देशबाट आउने पर्यटक संख्या दोब्बर वृद्धि हुने हुँदा परिवर्त्य मुद्रा स्वीकार गर्ने नीति लागु गरी मुलुक पर्यटनमैत्री भएको सन्देश प्रवाह गर्न शाहले आग्रह गरे ।