टाटा कर्भ ईभीमा काठमाडौंदेखि कन्याकुमारीसम्म यात्रा

काठमाडौं । सिप्रदी ट्रेडिङ प्रालिले काठमाडौंदेखि भारत कन्याकुमारीसम्मको ‘केटुके ड्राइभ’ सम्पन्न गरेका अवशिषप्रसाद ओझा र विजयराम कासजुका लागि शुभकामना कार्यक्रम आयोजना गरेको छ ।

विश्व वातावरण दिवस २३ जेठका दिन थापाथलीस्थित टाटा मोटर्स शोरुमबाट टाटा कर्भ ईभीमा सुरु गरिएको यो विद्युतीय गाडीको यात्रा भारतको दक्षिणी छेउ कन्याकुमारीसम्म पुगेर करिब ६ हजार ७ सय किलोमिटर यात्रापछि थापाथलीस्थित टाटा मोटर्स शोरुममै आएर सम्पन्न भएको छ ।

आज मंगलबार टाटा कर्भ ईभीको यात्रामा सहभागी अटो उत्साहीद्वय ओझा र कसजुसँग थापाथलीस्थित पीभीईबीयू शोरुममा अनुभव आदान–प्रदान कार्यक्रम आयोजना गरिएको थियो । कार्यक्रममा यात्रा अनुभव, चार्जिङ इन्फ्रास्ट्रक्चर, सडक अवस्था र टाटा कर्भ ईभीको उत्कृष्ट प्रदर्शनबारे छलफल भएको थियो ।

यात्रामा सहभागी ओझाले भने, ‘कर्भ ईभीले लामो दुरीको यात्रा अत्यन्त सहज र रोमाञ्चक बनायो । भारतभरिका चार्जिङ स्टेसन, रोड कन्डिसन र गाडीको पर्फर्मेन्स उत्कृष्ट रहेको अनुभव गर्‍यौं । कर्भ ईभीले भारतमा एकै चार्जमा ५ सय किलोमिटरभन्दा बढीसम्म रेन्ज दियो र नेपालमा ३ सय ७५ किलोमिटरभन्दा बढी रेन्ज दिएको थियो, जुन एकदमै प्रभावशाली रह्यो । टाटाको गाडी लिएर भारत जाने सोच्दै हुनुहुन्छ भने ढुक्क भएर यात्रा गर्न सकिन्छ ।’

यात्राका अर्का सहभागी विजय कसजुले थपे, ‘यात्रा केवल ड्राइभमात्र होइन, यो विद्युतीय सम्भावनाहरूको परीक्षण थियो, र हामी उत्साहित छौं कि कर्भ ईभीले त्यो सम्भावनालाई प्रमाणित गर्‍यो ।’

कार्यक्रममा प्यासेन्जर गाडी डिभिजनका जनरल म्यानेजर सावन्तजंग सिजापतिले भने, ‘हामी यस ऐतिहासिक ड्राइभमा जोडिन पाएकोमा गर्व गर्छौं । यी प्रेरणादायक अटो उत्साहीलाई धेरै–धेरै बधाई छ । कुनै समय काठमाडौं बाहिर विद्युतीय गाडी लग्न दुईचोटि सोच्नुपर्थ्यो, अहिले नेपालबाट भारतको यात्रा गर्दा पनि सहज छ भने सन्देश यो केटुके ड्राइभले पुष्टि गरेको छ ।’