देउवाले पाँच पूर्वपदाधिकारीसँग भने- सभापतिबारे कसैलाई ग्रिन सिग्नल दिएको छैन

६ साउन, काठमाडौं । नेपाली कांग्रेसका सभापति शेरबहादुर देउवाले १५औं महाधिवेशनका सभापतिको उम्मेदवारका लागि कसैलाई पनि समर्थन गर्ने वचन नदिएको बताएका छन् ।

सभापतिलाई भेट्न बूढानीलकण्ठ गएका पाँच पूर्वपदाधिकारीलाई देउवाले आफूले कसैलाई पनि ‘ग्रिन सिग्नल’ नदिएको बताएको भेटमा सहभागी नेता गोपालमान श्रेष्ठले जानकारी गराए ।

नेताहरूको जिज्ञासामा सभापति देउवाले कोही कसैलाई आफूले समर्थन गर्ने नबताएको बताएका थिए ।

बैठकमा सभापतिसँग आफूले राखेको भनाइबारे श्रेष्ठले भने, ‘१४औं महाधिवेशनमा म सभापतिको उम्मेदवार हुन्छु भनेको थिएँ । तपाईंले १५औं महाधिवेशनमा मलाई बनाउने वचन दिनु भएको थियो । सोही कारण त्यसबेला मैले उम्मेदवारी छाडेको भन्दा उहाँ (देउवा) हाँस्नुभयो ।’

देउवालाई भेट्न नेताहरू कृष्णप्रसाद सिटौला, प्रकाशमान सिंह, विजय गच्छदार, गोपालमान श्रेष्ठ र डा. प्रकाशशरण महत पुगेका थिए ।

सात जना पूर्वपदाधिकारी समूहमध्ये विमलेन्द्र निधि र डा. शशांक कोइराला भने भेटमा सहभागी थिएनन् ।

कांग्रेसबाट सरकारमा सहभागी मन्त्रीहरूको कामको मूल्यांकन गरेर फिर्ता गर्न सुझाव दिइएको उनले बताए ।

‘राम्रो काम गर्नेलाई राख्ने र राम्रा काम गर्न नसकेका मन्त्रीलाई हटाउन सुझाव दिऔं,’ श्रेष्ठले भने । बैठकमा सरकारको प्रभावकारिताका विषयमा पनि कुरा भएको उनले बताए ।

कांग्रेसका सात पूर्वपदाधिकारीले आगामी महाधिवशेनमा छुट्टै समीकरण बनाउने गरी निरन्तर भेटघाट गर्दै आएका छन् ।

त्यसै क्रममा सोमबार नेता प्रकाशमान सिंहको निवास चाक्सीबारीमा नेताहरू छलफलमा जुटेका थिए ।

सिंह निवासमा भएको छलफलको आधारमा सरकार र सभापति देउवालाई कांग्रेस–एमाले बीचमा भएको सहमति कार्यान्वयन गर्न ध्यानाकर्षण गराउने उद्देश्यले नेताहरू बूढानीलकण्ठ पुगेका थिए ।