कैलालीमा जलस्रोत र सिँचाइ कार्यालय भवनको उद्घाटन

१६ साउन, धनगढी । सुदूरपश्चिम प्रदेशका भौतिक पूर्वाधार विकासमन्त्री सुरेन्द्रबहादुर पालले नवनिर्मित कार्यालय भवनको उद्घाटन गरेका छन् ।

मन्त्री पालले शुक्रबार प्रदेश सरकार अन्तर्गत रहेको पथरैया मोहना सिँचाइ व्यवस्थापन कार्यालय कैलाली र भूमिगत जलस्रोत तथा सिँचाइ विकास डिभिजन कार्यालय धनगढीको नवनिर्मित भवनको उद्घाटन गर्दै निरीक्षण समेत गरेका छन् ।

दुवै कार्यालयका भवन शहरी विकास तथा भवन निर्माण कार्यालय धनगढीले गत आर्थिक वर्षको वार्षिक योजनाअनुसार ठेक्का प्रक्रिया मार्फत निर्माण गरेको थियो ।

शहरी विकास तथा भवन निर्माण कार्यालयका प्रमुख डम्बर धितालले एउटा कार्यालयको एक करोड ९२ लाख ६० हजार बराबरको लागत स्टमेट रहेकोमा ठेक्का प्रक्रिया मार्फत एक वर्षमै निर्माण सम्पन्न गरिएको बताए ।

उनकाअनुसार पथरैया मोहना सिँचाइ व्यवस्थापन कार्यालयको भवन निर्माणका लागि एक करोड १२ लाख १४ हजारमा ठेक्का सम्झौता भएको थियो ।

१६ वैशाख २०८१ मा सम्झौता भएको उक्त भवन निर्माण व्यवसायीले सम्पन्न गरेर गत वैशाखमा कार्यालयलाई हस्तान्तरण गरेको थियो ।

यस्तै, भूमिगत जलस्रोत तथा सिँचाइ व्यवस्थापन कार्यालयको भवन पनि एक करोड १२ लाखमै सम्झौता गरिएको थियो । उक्त भवन पनि निर्माण व्यवसायीले निर्धारित समयमै सम्पन्न गरेको हस्तान्तरण गरेका थिए ।

भवनको उद्घाटन गर्दै मन्त्री पालले दुवै कार्यालय भवन जीर्ण अवस्थामा रहेकाले आवश्यकता महसुस गरेर प्रदेश सरकारले बजेट विनियोजन गरेको बताए ।

उनले कार्यालय व्यवस्थित नभएसम्म प्रभावकारी रूपमा कार्य सम्पादन गर्न समेत असहज हुने भएकाले अब भने भूमिगत जलस्रोत तथा सिँचाइ व्यवस्थापन कार्यालय र पथरैया मोहना सिँचाइ व्यवस्थापन कार्यालयलाई सहजता मिल्ने बताए ।

सहज र प्रभावकारी सेवा प्रवाहका लागि कार्यालय व्यवस्थापन प्रमुख कुरा भएको उनको भनाइ थियो ।