विकास आयोजना समयमै सकौं : कार्यवाहक प्रधानमन्त्री सिंह

News Summary

Generated by OK AI. Editorially reviewed.

कार्यवाहक प्रधानमन्त्री प्रकाशमान सिंहले स्थानीय पूर्वाधार विकास विभागलाई विकास निर्माणका काम समयमै सम्पन्न गर्न निर्देशन दिएका छन्।
सिंहले गत आर्थिक वर्ष २०८१/८२ को वार्षिक प्रगति ६५ प्रतिशतमात्र देखिएकोमा असन्तुष्टि जनाउँदै सुधार गर्न भने।
सहरी विकास मन्त्रालयका सचिव गोपाल सिग्देलले योजना दोहोरिन नदिन प्रदेश र स्थानीय तहसँग समन्वय गर्न विभागलाई निर्देशन दिए।

२१ साउन, काठमाडौं । कार्यवाहक प्रधानमन्त्री एवं सहरी विकासमन्त्री प्रकाशमान सिंहले विकास निर्माणका काम समयमै सक्न मातहत निकायलाई निर्देशन दिएका छन् ।

स्थानीय पूर्वाधार तथा विकास विभागको गत आर्थिक वर्ष २०८१/८२ को वार्षिक प्रगति समीक्षा गोष्ठीमा बुधबार उनले विभागलाई विकास निर्माणका आयोजना समयमा सम्पन्न गर्ने गरी काम गर्न आह्वान गरे ।

सहरी विकास मन्त्रालयको स्थानीय पूर्वाधार विकास विभागले सडक पूर्वाधार, झोलुंगे पुल, सडक पुल, स्थानीय तहको प्रशासकीय भवन र साना सिँचाइ आयोजनामा काम गर्छ ।

‘विकास निर्माण र पूर्वाधारसँग सम्बन्धित काम समयमा सकियोस् भन्ने जनताको चाहना पूरा गर्ने गरी काम गर्नतिर लाग्नुस् । त्यसका लागि मनत्रालयबाट गर्नुपर्ने केही छ भने भन्नुहोला । मन्त्रालयबाट गर्नुपर्ने काम गर्छौं ,’ उनले भने ।

गत वर्ष विभागको समग्र प्रगति ६५ प्रतिशतमात्र देखिएकोमा असन्तुष्टि जनाउँदै उनले विगतका कमजोरी पहिचान र समाधान गर्दै आगामी वर्ष उल्लेखनीय वृद्धि गर्नुपर्ने बताए ।

उनले अघिल्लो वर्षको समीक्षाबाट सिक्दै आगामी वर्षका योजना प्रभावकारी ढंगले कार्यान्वयन गर्न समयमै काम सुरु गर्न पनि निर्देशन दिए ।

कार्यवाहक प्रधानमन्त्री सिंहले स्थानीय पूर्वाधार विकास विभागले चालु वर्ष गर्ने योजना समयमै र गुणस्तरीय रूपमा सम्पन्न गर्नुपर्नेमा जोड दिए ।

कार्यक्रममा मन्त्रालयका सचिव गोपाल सिग्देलले कतिपय योजना दोहोरिएको भन्दै आयोजना क्षेत्र प्रदेश र स्थानीय तहसँग आवश्यक समन्वय गरी सुनिश्चित गरेर मात्रै काम अगाडी बढाउन विभागलाई निर्देशन दिए ।