पुनर्निर्माणको दुई वर्षमै खरानी भयो बबरमहल (तस्वीरहरू)

२५ भदौ, काठमाडौं । २०७२ सालको भूकम्पका कारण छियाछिया बनेको बबरमहल दरबार (वर्तमान सडक विभाग) भवन पुनर्निर्माण सकिएको दुई वर्ष मात्र भएको छ । सो भवन मंगलबार जेनजी आन्दोलनका क्रममा आगजनीमा पर्‍यो ।

भूकम्पपछि यो भवन नभत्काई प्रवलीकरण गरिएको हो । लन्डनको बकिङघम दरबारको नेपाली रूप मानिने बबरमहल दरबार १ सय वर्ष पुराना पुरातात्विक सम्पदामध्ये एक हो । सोहीकारण तत्कालीन पुनर्निर्माण प्राधिकरणले यो दरबार नभत्काई प्रवलीकरण मात्र गरेको थियो ।

८६ करोड लागतमा पुनर्निर्माण गरिएको यो भवन निर्माणको काम दुई वर्ष अघि मात्र सम्पन्न भई सडक विभागले काम थालेको थियो । यो भवनमा सडक विभाग भने २००७ सालदेखि नै बस्न थालेको हो ।

सडक विभागका महानिर्देशक डा. विजय जैसीका अनुसार आगलागीका कारण यस भवनको आधा भन्दा बढी भाग मर्मत नै गर्न नसकिने गरी जलेको छ । यसबाट भएको क्षतिको आंकलन गर्ने काम भइरहेको उनले बताए । भवनमा रहेको डाटा सेन्टर भने सुरक्षित रहेको उनले जानकारी दिए ।

२०७२ सालको भूकम्पले यस भवनमा क्षति गरेपछि सडक विभाग पाटन सारिएको थियो ।

महालेखा परीक्षकको कार्यालयले समेत यसअघि यसै दरबारबाट काम गरिरहेको थियो । अहिले महालेखाको कार्यालय अनामनगरमा सारिएको छ । भूकम्पले महालेखातर्फको भागमा कम क्षति गरेको थियो । अहिले पनि अगाडिको भागमा आगजनीको क्षति अधिक देखिएको छ ।

तस्वीरहरू : जनार्दन बराल/अनलाइनखबर